आभासी चलनाविरोधात तक्रारी करण्याचे आवाहन

ठाणे - "एमटीसी' या आभासी चलनाद्वारे फसवणूक झालेल्या गुंतवणूकदारांना फरारी आरोपी अमित लखनपाल याच्याविरोधात पुढे येण्यासाठी ठाणे पोलिसांनी तक्रार दाखल करण्याचे आवाहन केले आहे. या प्रकरणात हजारो गुंतवणूकदारांची फसवणूक झाली आहे; मात्र प्रत्यक्षात 12 गुंतवणूकदारांनी तक्रार केली आहे.

ठाणे पोलिसांच्या गुन्हे अन्वेषण शाखा युनिट एकने "एमटीसी' या अभासी चलनाचे मोठे प्रकरण उघड केले आहे. यात हजारो गुंतवणूकदारांची फसवणूक झाली आहे. ही फसवणूक शेकडो कोट्यवधींच्या घरात असल्याचे पोलिसांचे म्हणणे आहे. लखनपाल याच्याविरोधात गुंतवणूकदारांनी पुढे येऊन तक्रार दाखल करावी, असे आवाहन ठाणे पोलिसांनी केले आहे, अशी माहिती गुन्हे अन्वेषण शाखा युनिट एकचे वरिष्ठ पोलिस निरीक्षक नितीन ठाकरे यांनी दिली.