पुढील वर्षी रविवारसह 73 सुट्यांची पर्वणी

मुंबई - यंदाच्या वर्षात रविवारी आलेल्या सार्वजनिक सुट्यांमुळे रजेच्या नियोजनाला कात्री लागली असली, तरी २०१९ मध्ये त्याची कसर भरून निघणार आहे. २०१९ मध्ये सण, समारंभ आणि सहलीच्या नियोजनासाठी नोकरदारांना सुट्ट्यांची खूशखबर आहे. २०१९ मध्ये तीन सुट्ट्या वगळता उरलेल्या २१ रजा इतर वारी येणार आहेत. रविवारसह एकूण ७३ सुट्ट्यांची पर्वणी मिळणार आहे.

२०१९ च्या दिनदर्शिका तयार करण्याचे काम पूर्ण झाले आहे. पंचांगकर्ते आणि खगोल अभ्यासक दा. कृ. सोमण यांनी पुढील वर्षीच्या सुट्ट्यांचे दिवस अधिक असल्याचे जाहीर केले आहे. डॉ. बाबासाहेब आंबेडकर जयंती, लक्ष्मीपूजन आणि ईद-ए-मिलादच्या तीन सुट्ट्या रविवारी आल्या आहेत. विशेष म्हणजे, त्यात रविवारला जोडून शनिवारी किंवा सोमवारी येणाऱ्या सुट्ट्यांची संख्या अनुक्रमे पाच आणि चार आहे. दुसरा किंवा चौथा शनिवार, नंतर रविवार आणि सोमवारचीही सुट्टी असा वीकेण्ड नियोजन करण्याची संधी नोकरदारांना एकदा  मिळणार आहे. सुट्ट्यांची अधिकृत यादी सरकार नंतर प्रसिद्ध करते, असे सोमण यांनी सांगितले.

2019 च्या सुट्या
प्रजासत्ताक दिन  - शनिवार, २६ जानेवारी
शिवाजी महाराज जयंती - मंगळवार, १९ फेब्रुवारी
महाशिवरात्री - सोमवार, ४ मार्च
होळी धूलिवंदन - गुरुवार, २१ मार्च
गुढीपाडवा - शनिवार, ६ एप्रिल
श्रीरामनवमी - शनिवार, १३ एप्रिल
डॉ. आंबेडकर जयंती - रविवार, १४ एप्रिल
श्रीमहावीर जयंती - बुधवार, १७ एप्रिल
गुड फ्रायडे - शुक्रवार, १९ एप्रिल
महाराष्ट्र दिन - बुधवार, १ मे
बुद्ध पौर्णिमा - शनिवार, १८ मे
रमजान ईद - बुधवार, ५ जून 
बकरी ईद - सोमवार, १२ ऑगस्ट
स्वातंत्र्यदिन - गुरुवार, १५ ऑगस्ट
पारसी न्यू इयर (पतेती) - शनिवार, १७ ऑगस्ट
श्रीगणेश चतुर्थी - सोमवार, २ सप्टेंबर
मोहरम - मंगळवार, १० सप्टेंबर
महात्मा गांधी जयंती - बुधवार, २ ऑक्‍टोबर
दसरा - मंगळवार, ८ ऑक्‍टोबर
दिवाळी लक्ष्मीपूजन - रविवार, २७ ऑक्‍टोबर
दिवाळी बलिप्रतिपदा - सोमवार, २८ ऑक्‍टोबर
ईद-ए-मिलाद - रविवार, १० नोव्हेंबर
गुरू नानक जयंती - मंगळवार, १२ नोव्हेंबर
नाताळ - बुधवार, २५ डिसेंबर