भाजपच्या प्रदेश सरचिटणीपदी आमदार सुरेश हाळवणकर  

इचलकरंजी - येथील आमदार सुरेश हाळवणकर यांची भारतीय जनता पक्षाच्या प्रदेश सरचिटणीसपदी निवड झाली आहे. प्रदेशाध्यक्ष रावसाहेब दानवे - पाटील यांनी त्यांची नियुक्ती केली आहे. निवडीचे पत्र आमदार हाळवणकर यांना ई-मेलव्दारे प्राप्त झाले आहे. त्यांच्या निवडीने भाजप कार्यकर्त्यांमध्ये उत्साहाचे वातावरण निर्माण झाले आहे. 

भारतीय जनता पक्षाच्या स्थापनेपासून श्री.हाळवणकर पक्षाचे काम करीत आहेत. अखिल भारतीय विद्यार्थी परिषदेपासून त्यांच्या कारकिर्दीस सुरुवात झाली. युवा मोर्चाबरोबरच पक्षाचे शहराध्यक्षपद त्यांनी भूषविले आहे. नगरसेवक, उपनगराध्यक्ष पदावरही त्यांनी काम केले आहे. भाजपचे ग्रामीण विभागाचे जिल्हाध्यक्षपद ही त्यांनी दोनवेळा सक्षमपणे सांभाळले आहे.
कोल्हापूर जिल्ह्यातील भाजपचे विधानसभेतील ते पहिले आमदार आहेत. सध्या इचलकरंजी विधानसभा मतदार संघात दुसऱ्यांदा ते आमदार म्हणून कार्यरत आहेत. नुकत्याच झालेल्या विविध स्थानिक स्वराज संस्था निवडणूकीत भाजपला चांगले यश मिळाले आहे. त्यामध्ये आमदार हाळवणकर यांचा मोठा वाटा आहे. त्यांच्या कार्याची दखल घेवून त्यांना पक्षाच्या प्रदेश पातळीवर काम करण्याची संधी उपलब्ध करुन देण्यात आली आहे.