शाहूपुरीत युवकावर बिबट्याचा हल्ला 

शाहूपुरीत युवकावर बिबट्याचा हल्ला 

सातारा -  शाहूपुरीतील मध्यवस्तीमधील खटावकर कॉलनी परिसरात आज सायंकाळी बिबट्याने एका युवकावर हल्ला केल्यामुळे खळबळ उडाली. परिसरातील नागरिकांनी पोलिस व वन विभागाच्या कर्मचाऱ्यांसह शोध मोहीम सुरू केली असून, परिसरात भीतीचे वातावरण आहे. गौरव शंकर माने (वय 17, रा. शाहुपूरी) असे जखमी युवकाचे नाव आहे. खासगी रुग्णालयात उपचारानंतर त्याला घरी सोडण्यात आले. 

घटनास्थळावरून मिळालेल्या माहितीनुसार, काल रात्रीपासून खटावकर कॉलनी व आंबेदरे रस्त्याच्या परिसरात कुत्री भुंकत होती. त्यामुळे नागरिकांना संशय आला होता. आज सायंकाळीही कुत्री भुंकू लागल्याने युवकांनी परिसरात शोध सुरू केला. सायंकाळी सहाच्या सुमारास परिसरात असलेल्या एका घळीमध्ये बिबट्यासारखा प्राणी असल्याचे या युवकांना दिसले. नेमके काय आहे, हे पाहण्यासाठी गौरव माने व इतर चार ते पाच युवक त्या दिशेने गेले. त्या वेळी बिबट्याने पाठीमागून गौरववर हल्ला केला. बिबट्याचा पंजा त्याच्या मांडीवर बसला. नखे लागल्याने तो जखमी झाला. गौरव व इतर युवकांनी आरडाओरडा केला. त्यामुळे बिबट्या जवळच्या झाडीत पळाला. 

आरडाओरडा पाहून परिसरातील नागरिक गोळा झाले. गौरववर बिबट्याचा हल्ला झाल्याची माहिती शाहुपुरी, तसेच शहरात पसरली. त्यामुळे परिसरात मोठी गर्दी झाली होती. शाहुपुरी पोलिस व वन विभागाचे कर्मचारी तातडीने दाखल झाले. त्यांनी युवकांच्या मदतीने शोध मोहीम सुरू केली होती. या घटनेमुळे परिसरात भीतीचे वातावरण पसरले आहे. परिसरातील नागरिक विजेचे दिवे व दरवाजे बंद करून बसले होते. गेल्या काही दिवसांपासून डोंगरावर वणवे लागण्याच्या प्रमाणात वाढ झाली आहे. त्यामुळे हा बिबट्या खाली आला असल्याची शक्‍यता वनविभागाकडून वर्तविण्यात येत होती. 

गोंधळ, छेडछाड करू नका 
गोंधळ, गर्दी किंवा छेडछाड झाल्याशिवाय कोणताही वन्य प्राणी हल्ला करीत नाही. त्यामुळे नागरिकांनी या गोष्टी टाळाव्यात. तो आपल्या मार्गाने निघून जाईल. कोणीही काळजी करू नये, असे आवाहन वनक्षेत्रपाल महेश शिंदे यांनी "सकाळ'शी बोलताना केले. 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News
www.esakal.com