चौथ्या दिवशी प्रारुप मतदार यादी प्रसिद्ध 

सोलापूर - तांत्रिक कारणामुळे रखडलेली महापालिका प्रभाग 14 क च्या पोटनिवडणुकीसाठीची प्रारुप मतदार यादी अखेर मंगळवारी प्रसिद्ध झाली. दुपारी ती ऑनलाईन अपलोड करण्यात आली. 

दरम्यान, फेब्रुवारी 2017च्या तुलनेत आता तब्बल 2288 नवमतदारांची भर पडली आहे. यादी प्रसिद्ध होण्यास विलंब होत असल्याबद्दल "सकाळ'मध्ये आज (मंगळवारी) बातमी प्रसिद्ध झाल्यावर निवडणूक कार्यालयातील कर्मचाऱ्यांनी तातडीने हालचाली करून आयोगाकडून यादी उपलब्ध करून ती अपलोड केली. 

राज्य निवडणूक आयोगाने दिलेल्या कार्यक्रमानुसार, 17 फेब्रुवारी रोजी यादी प्रसिद्ध होणे अपेक्षित होते. मात्र काही तांत्रिक अडचणी निर्माण झाल्याने ती वेळेत प्रसिद्ध होऊ शकली नाही. यादी उपलब्ध करून घेण्यासाठी महापालिका निवडणूक कार्यालयातील अधिकारी व कर्मचारी सातत्याने राज्य निवडणूक आयोग कार्यालयातील अधिकाऱ्यांच्या संपर्कात होते. ही यादी निवडणूक कार्यालयात तसेच solapurcorporation.org या संकेतस्थळावरही उपलब्ध करण्यात आली आहे. 

महापालिका प्रभाग 14 क मधील कॉंग्रेसचे नगरसेवक रफीक हत्तुरे यांचे निधन झाल्यामुळे ही पोटनिवडणूक होत आहे. राज्यातील पाच महापालिकांतील आठ ठिकाणच्या पोटनिवडणुकांसाठी मतदार यादी तयार करण्याचे वेळापत्रक राज्य निवडणूक आयोगाने 7 फेब्रुवारी रोजी प्रसिद्ध केली आहे. या पोटनिवडणुकीसाठी 1 जानेवारी 2018 ही अर्हता दिनांक निश्‍चित धरून आणि 10 जानेवारीपर्यंत अस्तित्वात असलेल्या यादीवर आधारीत प्रारुप मतदार यादी तयार करण्यात आली आहे. त्यानुसार आता 2288मतदार वाढले आहेत. 

मतदार यादीचा तुलनात्मक तक्ता 
वर्ष स्त्री पुरुष एकूण 

2017 14,002 14,712 28,714 
2018 15,194 15,808 31,002 
----------------------------
वाढ 1192 1096 2288