इंग्रजी शाळांच्या विविध मागण्यांसाठी विधानभवनावर मोर्चा

जिल्हाध्यक्ष सोनाली सालके यांचे सहभागी होण्याचे आवाहन

टाकळी ढोकेश्वर (नगर): इंग्रजी शाळेसाठी स्वतंत्र संरक्षण कायदा लागू करण्यात यावा, आर.टी.ई. कायद्याप्रमाणे मोफत प्रवेशाचा थकलेला निधी तात्काळ वाटप करावा यासंह अन्य मागण्यांसाठी महाराष्ट्र इंग्रजी शाळा संस्था चालक मेस्टा संघटनेचा आज (शुक्रवार) नागपूर येथे विधानभवनावर मोर्चा काढण्यात येणार आहे, अशी माहिती संघटनेच्या जिल्हाअध्यक्षा सोनाली सालके यांनी दिली

सालके म्हणाल्या, इंग्रजी माध्यम शाळांना अनेक सरकारी निधी व योजनांनपासून वचिंत ठेवले जात आहे. मुलांच्या स्कूल बसला अतिरिक्त कर आकारण्यात येत आहे, तो बंद करण्यात यावा. या शाळांना स्थलांतराची परवानगी देण्यात यावी,  नैसर्गिक वर्ग वाढ व दर्जा वाढ त्वरीत देण्यात यावी इतर शाळांप्रमाणे या शाळांनाही शालेय पोषण आहार सुरू करण्यात यावा यासंह शिक्षकांचा सरकारने विमा उतरण्यात यावा व पेन्शन योजना सुरू करावी, या रास्त मागण्यांसाठी हा मोर्चा काढण्यात येणार आहे. हा मोर्चा संघटनेचे संस्थापक संजय तावडे यांच्या नेतृत्वाखाली होणार असून, या मोर्चात संस्था चालक व शिक्षकांनी सहभागी होण्याचे आवाहन सालके यांनी केले आहे.