आणखी एका टोळीला "मोका' 

सातारा - जिल्ह्यासह राज्यातील विविध भागांत दरोडे, जबरी चोरी, बलात्कार, घरफोडी असे गंभीर स्वरूपाचे गुन्हे करणाऱ्या फलटण व खंडाळा तालुक्‍यांतील टोळीतील तिघांवर "मोका' कायद्यानुसार कारवाई करण्यात आली आहे. जिल्हा पोलिसांनी "मोका'अंतर्गत केलेली ही आठवी कारवाई आहे. त्याचा गुन्हेगारांना चांगलाच धसका बसला आहे. 

चंद्रकांत  ऊर्फ चंदर लक्ष्मण लोखंडे (मूळ रा. ढवळ, ता. फलटण, सध्या, शिर्के पेपर मिलजवळ शिरवळ), नीलेश बाळासो निकाळजे (रा. सोनगाव, ता. फलटण) व अक्षय शिवाजी खताळ (रा. बिबी, ता. फलटण) अशी त्यांची नावे आहेत. 27 एप्रिल 2017 रोजी शिरवळ परिसरातील केदारेश्‍वर मंदिराजवळ दुचाकीवरून आलेल्या तिघांनी महिलेच्या गळ्यातील दागिने हिसकावून नेले होते. या प्रकरणी या तिघांना स्थानिक गुन्हे अन्वेषण विभागाचे निरीक्षक पद्‌माकर घनवट यांना मिळालेल्या माहितीच्या आधारे अटक केली होती. 

या गुन्ह्याच्या तपासामध्ये वरील तिघांच्या टोळीवर शिरवळ, लोणंद, फलटण ग्रामीण, खंडाळा, सातारा शहर, तालुका, कळंबोली, पनवेल (जि. रायगड) या ठिकाणी गंभीर स्वरूपाचे गुन्हे दाखल असल्याची माहिती समोर आली. या टोळीने स्वत:च्या आर्थिक फायद्यासाठी दहशत निर्माण करून सर्वसामान्य नागरिकांना वेठीस धरल्याचे समोर आले. त्यानंतर संबंधितांवर "मोका' कायद्यानुसार कारवाई करण्याबाबतच्या सूचना पोलिस अधीक्षक संदीप पाटील यांनी शिरवळ पोलिस ठाण्याचे निरीक्षक बी. एन. पाटील यांना दिल्या होत्या. निरीक्षक पाटील व घनवट यांनी याबाबतचा प्रस्ताव अधीक्षक पाटील व अतिरिक्त अधीक्षक विजय पवार यांच्यामार्फत कोल्हापूर परिक्षेत्राचे विशेष पोलिस महानिरीक्षक विश्‍वास नांगरे-पाटील यांना दिला होता. त्याला त्यांनी मंजुरी दिली आहे. त्यानुसार संबंधित गुन्ह्यामध्ये "मोका'चे कलम वाढविण्यात आले आहे. फलटणचे पोलिस उपअधीक्षक रमेश चोपडे तपास करत आहेत. या टोळीविरुद्ध काही तक्रारी असल्यास संबंधित पोलिस ठाण्यात नोंदवाव्यात, असे आवाहन करण्यात आले आहे.