अत्याचार करणाऱ्यांवरही आता तडीपारची कारवाई - विश्‍वास नांगरे-पाटील

सकाळ वृत्तसेवा
शुक्रवार, 30 मार्च 2018

सावकारीच्या बाबतीत आपण गंभीरतेने दखल घेतोय. चोऱ्या, घरफोड्या, अवैध धंदे, महिलांच्या छेडछाडीच्या घटनांसह गुंडागर्दी रोखण्यासाठी पोलिस प्रयत्नशील आहेत. पंढरपुरात गेल्या काही दिवसांत घडलेल्या घटना गंभीर आहेत. अंडरवर्ल्डसारखी गुंडागर्दी दिसून येत आहे. बाहेर राहूनही काहीजण दहशत ठेवण्याचा प्रयत्न करीत आहेत. अशा गुंडागर्दीला मोडून काढण्यासाठी आम्ही प्रयत्न करीत आहोत. 
- विश्‍वास नांगरे-पाटील, विशेष पोलिस महानिरीक्षक

सोलापूर : आजवर चोऱ्या, घरफोड्या करणाऱ्यांचे रेकॉर्ड ठेवले जायचे. आता आम्ही विनयभंग, बलात्कार आणि लहान मुलांवर अत्याचार करणाऱ्या आरोपींचे रेकॉर्ड ठेवण्यास सुरवात केली आहे. अशा आरोपींवर तडीपारची कारवाई करण्याची प्रक्रिया सुरू आहे. समाजातील वाईट प्रवृत्ती नष्ट करण्यासाठी पोलिस प्रशासन प्रयत्नशील असल्याचे कोल्हापूर परिक्षेत्राचे महानिरीक्षक विश्‍वास नांगरे-पाटील यांनी सांगितले. 

वार्षिक आढावा बैठकीनिमित्त कोल्हापूर परिक्षेत्राचे महानिरीक्षक विश्‍वास नांगरे-पाटील सोलापूर दौऱ्यावर आहेत. त्यांनी गुरुवारी सायंकाळी 'सकाळ' कार्यालयास भेट दिली. या वेळी ते बोलत होते. ते म्हणाले, "जे चांगलं आहे ते सगळीकडे राबविले जावे यासाठी मी प्रयत्नशील आहे. डॉल्बीमुक्त गणेशोत्सव उपक्रमास खूपच चांगला प्रतिसाद मिळाला. सार्वजनिक मंडळांनी एकत्र येऊन अनेक ठिकाणी सीसीटीव्ही कॅमेरे लावले आहेत. कोल्हापूर परिक्षेत्रातील कोल्हापूरसह, सोलापूर, सांगली, पुणे या जिल्ह्यांत अवैध धंदे करणाऱ्यांवर पोलिसांकडून तडीपारची कारवाई होत आहे. अवैध धंदेवाल्यांवर नियंत्रण आणण्यासाठी कायद्यात अनेक तरतुदी आहेत, त्या तरतुदींचा वापर केला जात आहे. 

सावकारीच्या बाबतीत आपण गंभीरतेने दखल घेतोय. चोऱ्या, घरफोड्या, अवैध धंदे, महिलांच्या छेडछाडीच्या घटनांसह गुंडागर्दी रोखण्यासाठी पोलिस प्रयत्नशील आहेत. पंढरपुरात गेल्या काही दिवसांत घडलेल्या घटना गंभीर आहेत. अंडरवर्ल्डसारखी गुंडागर्दी दिसून येत आहे. बाहेर राहूनही काहीजण दहशत ठेवण्याचा प्रयत्न करीत आहेत. अशा गुंडागर्दीला मोडून काढण्यासाठी आम्ही प्रयत्न करीत आहोत. 
- विश्‍वास नांगरे-पाटील, विशेष पोलिस महानिरीक्षक

Web Title: vishwas nangre patil talks about various issues