108 रुग्णवाहिका चौकात उलटली

उंडवडी : अपघातातील जखमींना आणण्यासाठी निघालेल्या 108 रुग्णवाहिका बारामती- पाटस रस्त्यावरील रिंग रोडला समोरुन भरधाव आलेल्या दुचाकीला वाचविताना चालकाचे नियंत्रण सुटल्याने भर चौकात पलटी  झाली. ही घटना आज (गुरुवारी) चार वाजण्याच्या सुमारास घडली. 

यामध्ये वैद्यकीय अधिकारी जखमी झाले आहेत. याबाबत मिळालेली माहिती अशी, आज दुपारी साडेतीन वाजता उंडवडी कडेपठार हद्दीत गॅस सिलेंडरचा ट्रक उलटला होता. या अपघातात जखमीना उपचार व्हावेत. यासाठी स्थानिक लोकांनी 108 या शासकीय रुग्णवाहिकेसाठी फोन केला होता. 

त्यानुसार ही रुग्णवाहिका बारामतीकडून - उंडवडी कडेपठारकडे भोंगा वाजतवत (सायरन) वेगात निघाली होती. बारामती शहराच्या बाहेर पाटस रस्त्याला आल्यानंतर देशमुख चौकात समोरील दुचाकीला वाचविताना रुग्णवाहिकेच्या चालकाने तातडीने ब्रेक लावला. यामध्ये रुग्णवाहिका जाग्यावर फिरली व पलटी झाली. आपघाताला कारणीभूत ठरलेला घटनेनंतर दुचाकीस्वार निघून गेला. 

या अपघातात वैद्यकीय अधिकारी डॉ. अशोक डोंबाळे हे जखमी झाले. त्यांच्या हाताला मार लागला आहे. तर चालक हेमंत खारतोडे यांना कोणतीही इजा झाली नाही.