निर्मलवारी उपक्रमाअंतर्गत यंदा उंडवडी सुपे परिसरात 500 शौचालय

विजय मोरे
रविवार, 8 जुलै 2018

उंडवडी सुपे परिसरात 300 व खराडेवाडी परिसरात 200 अशी 500 शौचालय युनिट उभे करण्यात येणार आहेत.

उंडवडी  : वारीच्या वाटेवर स्वच्छता राहावी, व वारकरी शौचासाठी उघड्यावर जावू नये. यासाठी यंदा जिल्हा परिषदेच्या वतीने निर्मलवारी या उपक्रमाअंतर्गत उंडवडी सुपे व खराडेवाडी (ता. बारामती) या दोन गावात पहिल्यांदाच मोठ्या प्रमाणावर फिरते शौचालय युनिट उभारण्यात येणार आहेत. यामध्ये उंडवडी सुपे परिसरात 300 व खराडेवाडी परिसरात 200 अशी 500 शौचालय युनिट उभे करण्यात येणार आहेत. या युनिट उभारण्यासाठी जागेची पाहणी निर्मलवारीचे महामार्ग प्रमुख किरण ढमडेरे, माऊली कुडले, रवींद्र दोरगे व बारामतीचे गटविकास अधिकारी प्रमोद काळे यांनी केली. 

यावेळी विस्तार अधिकारी दत्तात्रेय खंडागळे, सरपंच एकनाथ जगताप , ग्रामपंचायत सदस्या रंजना गवळी, रेणूका गवळी, अंजना गवळी, ज्ञानदेव जगताप, भगवान माकर, माजी सरपंच बापूराव गवळी, तंटामुक्तीचे अध्यक्ष संजय गवळी आदी ग्रामस्थ उपस्थित होते. 

निर्मलवारी या उपक्रमाअंतर्गत येथे खाजगी मालकीचीही वैयक्तिक शौचालय वारीतील वारकऱ्यांना खुली करुन देणार आहेत. यामध्ये उंडवडी सुपे येथे 165 व खराडेवाडी येथे 69 शौचालय वारकऱ्यांना वापरण्यासाठी खुली करुन देण्यात येणार आहेत.  यंदा वारीच्या वाटेवर दुर्गंधी आणि घाण होणार नाही.यासाठी विशेष काळजी घेण्यात येणार आहे. यासाठी निर्मलवारीची व स्थानिक टीम काम करणार आहे. त्यामुळे यंदा वारीच्या वाटेवर स्वच्छता राहण्यास मोठी मदत होणार असल्याने ग्रामस्थांमध्ये समाधानाचे वातावरण आहे. 
 

आपण एका क्लिकवर ताजे अपडेट्स आपल्या मोबाईलमध्येही मिळवू शकता.

Web Title: 500 toilets in this years Undavdi Supe area under Nirmalvari program