अंधाऱ्या वाटेवरचा ‘सुरेल’ प्रवास

डेक्कन - गायन-वादनात रमलेले (डावीकडून) विनोद पवार आणि रामदास गायकवाड.
डेक्कन - गायन-वादनात रमलेले (डावीकडून) विनोद पवार आणि रामदास गायकवाड.

पुणे - त्यांचे आयुष्य अंधाऱ्या वाटेवरचे... तसेही संघर्षाचेच, जीवनानुभवही तोच, जगण्याची उमेदही तशीच... ते एकमेकांचे सच्चे दोस्त... कुटुंबाचा उदरनिर्वाह चालविण्यासाठी डेक्कन जिमखाना येथे गायन-वादन करणारे हे रस्त्यावरचे कलाकार. आयुष्यातील प्रकाश हरपला असला, तरी जगण्याचा स्वाभिमान त्यांनी सोडलेला नाही. रामदास गायकवाड आणि विनोद पवार अशी या मित्रांची प्रेरणादायी असलेली ही कहाणी. 

रामदास आणि विनोद हे दोघेही दृष्टिहीन आहेत. दोघेही उत्तम गायन-वादन करतात. त्यांच्या गायन-वादनातून दररोज उदरनिर्वाहापुरते पैसे मिळतात.

रामदास यांची मुलगी कला शाखेच्या पहिल्या वर्षात शिकते, तर मुलगा सातवीला. एका कंपनीत ते नोकरी करत होते. पण टायफाइडमुळे अंधत्व आले. त्यानंतर कोणी नोकरी न दिल्याने त्यांनी कलापथकात गायन-वादनाला सुरवात केली.याबाबत रामदास सांगतात, ‘‘दिवसभर गायन-वादन करून जे पैसे मिळतात ते आम्ही दोघे वाटून घेतो. रोज २०० ते ३०० रुपये मिळतात. पण ते पुरेसे नाहीत.’’

विनोद म्हणाले, ‘‘आम्ही सकाळी सात वाजता एकमेकांना फोन करतो. भेटण्याची वेळ ठरवतो आणि नियोजित ठिकाणी जाऊन गायन-वादन करतो. ’’

दृष्टिहीन ‘जय-वीरू’
ही आधुनिक काळातील ‘जय-वीरू’ची जोडी आहे. रामदास यांचे शिक्षण झालेले नाही, तर विनोद दहावीपर्यंत शिकले आहेत. दोघेही चाळीशीतले. यांची भेट कलापथकात झाली आणि मैत्रीचा एक बंध गुंफला गेला. रामदास निगडीला राहतात, तर विनोद उरुळी कांचनला; पण सकाळी साडेदहा वाजता एकत्र येऊन हे दोघेही कला सादर करतात.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com