दुभाजक ओलांडताना टँकरच्या धडकेने महिलेचा मृत्यु

लोणंद : लोणंद- फलटण रस्त्यावर तरडगाव (ता. फलटण) गावच्या हद्दीत पालखी तळानजीक काल (ता.१५) रात्री १२.३० च्या सुमारास रस्ता दुभाजक ओलांडत असताना लोणंद बाजूकडून वेगात येणाऱ्या टँकरने जोरदार धडक देवून झालेल्या आघातात महाबळेश्वर येथील ४२ वर्षाय महिला जागीच ठार झाली.

याबाबत लोणंद पोलिस ठाण्यातून मिळालेली अधिक माहिती नुसार श्री. संत ज्ञानेश्वर माउलींच्या देवदर्शनासाठी महाबळेश्वर येथील विशाल रतीकांत तोष्णिवाल व त्यांची पत्नी कविता विशाल तोष्णिवाल हे तरडगाव येथे आले होते. तरडगाव पालखी तळावर रात्री बारा वाजता माउलींचे दर्शन घेवून पुन्हा घरी परतण्यासाठी लोणंद- फलटण रस्ता क्रॉस करुन रस्त्यापलीकडे लावलेल्या गाडीकडे जाण्यासाठी रस्ता दुभाजक ओलांडताना रस्त्यावर पाउल टाकत असतानाच लोणंद बाजूकडून फलटणकडे भरधाव वेगात निघालेला टँकरने (एमएच १० झेड - २७०८) जोरदार धडक देवून गंभीर कविता यांना गंभीर जखमी केले. रुग्णालयात दाखल करण्यापूर्वीच त्या मृत्यू पावल्या. टँकर चालक यशवंत रंगनाथ पावले (वय ३० रा. पावलेवाडी, ता. शिराळा, जि. सांगली) याच्या विरुद्ध विशाल तोष्णिवाल (वय ४६ रा. डॉ. साबळे रोड,महाबळेश्वर, जि. सातारा ) यांनी लोणंद पोलिस ठाण्यात फिर्याद नोंदवली आहे. पोलिस हवालदार श्री. दिघे हे अधिक तपास करत आहेत.