होलेवाडी येथील रेहाऊ पॉलिमर कंपनीचे कामगार संपावर

पुणे दावडी : होलेवाडी (ता.खेड) येथील रेहाऊ पॉलिमर प्रा. लिमिटेड कंपनीचे कामगार व्यवस्थापनाने खोटी कारणे देऊन नऊ कामगारांना निलंबित केल्याच्या निषेधार्थ वीस नोव्हेंबरपासून बेमुदत संपावर गेले आहेत.

निलंबित केलेले आठ कामगार व बडतर्फ केलेला एक कामगार यांना व्यवस्थापनाने तात्काळ कामावर घ्यावे अशी मागणी कामगारांनी केली आहे. होलेवाडी येथे असलेल्या रेहाऊ पॉलिमर कंपनीत कायम स्वरूपी सुमारे ६६ कामगार आहेत. हे कामगार पूना एम्प्लॉईज युनियनचे सदस्य आहेत. चार महिन्यांवर या कंपनीच्या कामगारांचा वेतन करार आला आहे. मात्र त्याआधीच व्यवस्थापनाने कामगारांवर दहशतीचे वातावरण निर्माण करायला सुरूवात केली आहे, असा आरोप संघटनेने केला आहे. कामगारांना खोटी कारणे देऊन किंवा १५ मिनीटे उशीरा आले, तसेच युनियनचे सभासद झाले यासारख्या क्षुल्लक कारणांवरून कंपनीने निलंबीत केले, असा संघटनेचा दावा आहे.

व्यवस्थापनाने आठ जणांना निलंबित केले असून एक जणास सेवेतून बडतर्फ केले आहे. त्यामुळे व्यवस्थापनाच्या निषेधार्थ रेहाऊ पॉलिमरचे कामगारांनी २९ ऑक्टोबरपासून संपावर जाण्याचा निर्णय घेतला होता. २१ दिवसांची पूर्वसूचना देऊन २० नोव्हेंबरपासून काम बंद ठेवून बेमुदत संपावर गेले आहेत. कंपनी गेटच्या रस्त्याच्या विरूध्द बाजूस कामगार एकत्र बसून शांततेच्या मार्गाने कामगारांचे आंदोलन सुरू आहे.

निलंबित केलेल्या व बडतर्फ कामगारांस कंपनीने तात्काळ परत घ्यावे म्हणजे कामगार संप लगेच मागे घेतील, असे विनोद हाडवळे व स्वप्नील बारमुख या पदाधिकाऱ्यांनी सांगितले. व्यवस्थापनाची कामगारांच्या संपाबाबतची भूमिका जाणण्याचा प्रयत्न केला असता कोणीही अधिकारी येथे उपस्थित नसल्याचे सुरक्षारक्षकांनी सांगितले.