मिलिंद एकबोटे यांच्या पोलिस कोठडीसाठी आग्रही - विश्वास नांगरे पाटील

देहूरोड - कोरेगाव भीमा येथील घटनेप्रकरणी मिलिंद एकबोटे यांना केवळ अटक करून त्यांना जामीन मिळणे, हे तपास यंत्रणेला अपेक्षित नाही. सदर घटनेच्या तपासाच्या दृष्टीने त्यांच्या पोलिस कोठडीसाठी आम्ही आग्रही असल्याची माहिती कोल्हापूर परिक्षेत्राचे विशेष पोलिस महानिरीक्षक विश्वास नांगरे पाटील यांनी दिली. अतिरिक्त पोलिस अधीक्षक तेजस्विनी सातपुते, देहूरोडचे उपविभागीय पोलिस अधिकारी गणपतराव माडगूळकर, देहूरोडचे पोलिस निरीक्षक अरुण मोरे, हिंजवडीचे निरीक्षक अरुण वायकर, पौडचे सुरेश निंबाळकर पत्रकार परिषदेला उपस्थित होते. 

मिलिंद एकबोटे यांच्या अटकेचा मुद्दा आणि याप्रकरणी न्यायालयाने पोलिसांवर ओढलेले ताशेरे, याबाबत नांगरे पाटील म्हणाले,  एकबोटे यांना पोलिस कोठडीच मिळावी, अशी भूमिका न्यायालयात मांडली आहे. अटक झाली नसल्यामुळे एकबोटे यांना ऍडिशनल रिलीफ मिळाला. 

दाभोलकर, पानसरे हत्याप्रकरण 
नरेंद्र दाभोलकर, गोविंद पानसरे यांच्या हत्त्येस तीन वर्षे उलटली तरी, आरोपी मोकाटच आहेत. यावर नांगरे पाटील म्हणाले,  सीबीआय आणि एसआयटीकडून सुरू असलेल्या तपासासाठी पोलिसांकडून मदत केली जात आहे. याप्रकरणी कर्नाटक सीमेवरील पाच जिल्हे आणि आपल्या तीन जिल्ह्यातील वरिष्ठ पोलिस अधिकाऱ्यांची बैठक झाली आहे. त्यात मी स्वत: हजर होतो. सारंग अकोलकर आणि विनय बापूराव पवार यांच्यापर्यंत तपास पोचला आहे. सरकारने मारेकऱ्यांची माहिती देणाऱ्यास दहा लाखांचे बक्षीसही जाहीर केले आहे. तपासाच्या दृष्टीने विशेष पथक कार्यरत आहे. तपासाची गती कमी केली नाही. सगळ्या बाजूने तांत्रिक बाबी तपासून धागेदोरे मिळविण्यासाठी गांभीर्याने काम सुरू आहे. 

टवाळखोर वठणीवर 
निर्भया महिला पोलिसांच्या पथकाने कोल्हापूर परिक्षेत्रातील ठाण्यांच्या हद्दीतील 22 हजारांहून अधिक टवाळखोरांना वठणीवर आणले. गुन्हे करणाऱ्यांना अद्दल घडविली जाईल, असे पाटील यांनी सांगितले. पोलिस ठाण्यांशी संबंधित समस्यांचे निरसन केले.