स्पायसर विद्यापिठातील फसवणूकीबाबत कारवाई व्हावी 

बाबा तारे
रविवार, 10 जून 2018

दोन वर्षापूर्वी अ‍ॅडव्हेंटीस्ट टायडींग्ज मॅगझीन व अ‍ॅडव्हेंटीजस्ट हॅरीटेस्ट या मासिकांमध्ये नोबल पिल्ले, चाको पॉल आणि जेयम यांना पीएचडी मिळाल्याचे वृत्त सामाजिक कार्यकर्ते  अलमेडीया यांनी वाचले होते. यासंदर्भात त्यांनी स्पायसर विद्यापिठाकडे माहिती अधिकार कायद्याअंतर्गत या पदवीची माहिती मागितली होती. परंतू, विद्यापीठाने आम्ही माहिती अधिकाराच्या अंतर्गत येत नसल्याचे सांगत उत्तर दिले नव्हते.शेवटी सामाजिक कार्यकर्ते अलमेडीया यांनी  बाबत महिती  घेऊन ही पदवी बनावट असल्याचे लक्षात आल्यावर चतु:श्रुंगी पोलीस ठाण्यात याविरोधात तक्रार दाखल केली. याविषयी, गुन्हा नोंद होऊन गुन्हे शाखेच्या युनिटने याचा तपास केला असता, पिल्ले, चाको पॉल आणि जयेम यांनी हिमाचल प्रदेशमधील भारती युनिवर्सीटी, लाडो सुलतानापूर येथून घेतल्याचे समोर आले. याच पी.एच.डी.च्या जोरावर स्पायसर विद्यापीठात या तिघांनी पदोन्नती मिळवली. या तिघांनी गोपाल खंदारे यांच्या मदतीने मानव भारती विद्यापीठाकडून बनावट पी.एच.डी.ची पदवी मिळवली असल्याचे समोर आले होते.

पुणे (औंध) - औंध परिसरातील स्पायसर अॅडव्हेंटीस्ट विद्यापीठाचे कुलगुरु नोबल प्रसाद पिल्ले यांनी बनावट पी.एच.डी. पदवीद्वारे पदोन्नती आणि आर्थिक फायदे घेवून फसवणूक केल्याचे प्रकरण काही दिवसांपुर्वीच उघड झाले आहे. या प्रकरणी कुलगुरुंसह यात सहभागी असलेल्या इतरांवर कडक कारवाई करुन विद्यापीठावर प्रशासकाची नेमणूक करावी अशी मागणी शिवसेना प्रवक्त्या डॉ.निलम गो-हे यांनी राज्यपाल डॉ. सी. विद्यासागर राव यांच्याकडे मेलद्वारे केली आहे. 

बनावट पदवीच्या आधारे कुलगुरूंनी सन २०१० ते २०१३ या कालावधीत स्पायसर अॅडव्हेंटीस्ट विद्यापठात पदोन्नती आणि आर्थिक फायदे घेऊन फसवणूक केली आहे. खासदार उदयनराजे भोसले यांनीही याप्रकाराबाबत मला पत्र देवून लक्ष वेधले होते याची माहितीही यावेळी डॉ.गो-हे यांनी दिली. याप्रकरणी सामाजिक कार्यकर्ते अॅलन अलमेडिया यांनी चतु:श्रुंगी पोलीस ठाण्यात १६ मे २०१८ रोजी कुलगुरूसह इतर पाच जणांविरुद्ध तक्रार केली होती. यावरुन, कुलगुरुंसह इतरांवर गुन्हा दाखल करण्यात आला आहे. यात कुलगुरू नोबल प्रसाद पिल्ले, मुख्य वित्तीय अधिकारी रत्नास्वामी जयेम, कला शाखेचे प्रमुख चाको पॉल, क्रिएटीव्ह एज्युकेशनल फाऊंडेशनचे संचालक गोपाल भिकाजी खंदारे आणि या बनावट पदव्या मिळवून देणारा अशा पाच जणांवर स्पायसर विद्यपीठाची फसवणुक केल्याचा गुन्हा दाखल करण्यात आला आहे. तरी याप्रकरणी विद्यापीठावर तात्काळ प्रशासकाची नेमणूक करुन आरोपींवर कडक कारवाई करावी आणि विद्यापिठाचे जे आर्थिक नुकसान झाले आहे त्याचीही भरपाई करून घेण्यात यावी अशी मागणी डॉ.गो-हे यांनी केली आहे.

Web Title: please take Action about fraud in the Spaisar University