तलाव वाहून गेल्यावर दुरुस्ती करणार?: आमदार सोनवणे

जुन्नर (पुणे) : तालुक्‍याच्या आदिवासी भागातील भिवाडे बुद्रुक येथील जुना रामजेवाडी साठवण तलाव पावसाळ्यात वाहून गेल्यावर दुरुस्ती करणार? अशी विचारणा आमदार शरद सोनवणे यांनी तालुका समन्वय समितीच्या बैठकीत अधिकाऱ्यांना केला.

अतिवृष्टीने या तलावाचा सांडवा तीन वर्षापूर्वी वाहून गेला. दरवर्षी पाणr वाहून सांडव्याचे नुकसान होत आहे. पाटबंधारे विभागाने सुमारे दीडकोटी खर्चाचे अंदाजपत्रक केले. मात्र, एक वर्ष होऊनही दुरुस्ती झाली नाही यामुळे या पावसाळ्यात पाणी वाहुन जात असून, पाणीसाठा कमी होणार असल्याची भिती व्यक्त होत आहे. भिंतीची दुरुस्ती आवश्‍यक आहे. पोटचाऱ्या नादुरुस्त आहेत, अशा अनेक गंभीर स्वरुपाच्या तक्रारी आहेत. पाटबंधारे विभाग गांभीऱयाने दखल घेत नाही, अशी खंत यावेळी व्यक्त करुन ही कामे तातडीने करणे बाबत त्यांनी संबधित अधिकाऱ्यांना सांगितले.