...आणि "पोलिसकाका' धावून आले 

येरवडा - इयत्ता नववीत शिकणारी विद्यार्थिनी चंदननगर येथून सहा आसनी रिक्षाने शाळेत निघाली होती. रिक्षात जागा नसल्यामुळे चालकाने विद्यार्थिनीला शेजारी बसण्यास सांगितले. प्रवासादरम्यान त्याने तिच्याशी अश्‍लील चाळे केले. घाबरलेल्या विद्यार्थिनीने शाळेत आल्यानंतर मैत्रिणीच्या मदतीने येरवडा पोलिस ठाण्यात संपर्क करताच "पोलिसकाका' तिच्या मदतीला धावून आले. 

पीडित मुलगी येरवड्यातील एका इंग्रजी माध्यमाच्या शाळेत शिकत आहे. नेहमी तिचे पालक तिला शाळेत सोडतात. मात्र बुधवारी सकाळी ती एकटी सहा आसनी रिक्षाने शाळेला जाण्यासाठी निघाली होती. रिक्षात बसण्यास जागा नसल्याने चालक राहुल विजयकुमार वाघमारे (रा. आनंद पार्क, वडगावशेरी) याने तिला पुढे येऊन शेजारी बसण्यास सांगितले. प्रवासादरम्यान तिची विचारपूस करत अश्‍लील चाळे केले. एवढेच नाही तर तिला परत दुपारी तीन वाजता शास्त्रीनगर चौकात येऊन थांब तुला घेण्यासाठी येतो, असे सांगितले. पीडित विद्यार्थिनीने मैत्रिणीच्या मदतीने शाळेत लावलेल्या येरवडा पोलिस ठाण्याच्या पोलिसकाकांच्या मोबाईलवर संपर्क केला. 

पोलिस निरीक्षक (गुन्हे) अशोक कदम यांनी सांगितले, की आरोपी वाघमारे याच्या विरुद्ध विनयभंग आणि बाललैंगिक अत्याचारापासून संरक्षण (पॉक्‍सो) कायद्यानुसार गुन्हा दाखल केला असून, संबंधित गुन्हा विमानतळ पोलिस ठाण्याच्या हद्दीत घडल्याने तेथे वर्ग केला आहे.'' आरोपीला पकडण्यासाठी पोलिस पथक गेल्याची माहिती विमानतळ पोलिसांनी दिली.