#SaathChal तुकाराम महाराज संस्थानाची तयारी

सकाळ वृत्तसेवा
सोमवार, 2 जुलै 2018

देहू - आषाढी वारीसाठी जगद्‌गुरू संत श्री तुकाराम महाराज पालखी सोहळा अवघ्या तीन दिवसांनी आहे. या पार्श्वभूमीवर संत तुकाराम महाराज संस्थानने जय्यत तयारी केली आहे. मुख्य देऊळवाड्यात दिंडी सप्ताहाला गाथा पूजन करून सुरवात झाली आहे.

देहू - आषाढी वारीसाठी जगद्‌गुरू संत श्री तुकाराम महाराज पालखी सोहळा अवघ्या तीन दिवसांनी आहे. या पार्श्वभूमीवर संत तुकाराम महाराज संस्थानने जय्यत तयारी केली आहे. मुख्य देऊळवाड्यात दिंडी सप्ताहाला गाथा पूजन करून सुरवात झाली आहे.
अधिक मासामुळे यंदा आषाढी वारी २२ दिवसांनी उशिरा आहे. शेतातील पेरण्यांची कामे उरकून मोठ्या संख्येने भाविक वारी सोहळ्यात सहभागी होण्याची शक्‍यता आहे. या पार्श्वभूमीवर पालखी प्रस्थानाच्या दिवशी देऊळवाड्यातील भजनी मंडपात पास असणाऱ्यांना प्रवेश देण्याची सूचना पोलिसांनी केली आहे. त्यामुळे दोनशे पास देण्याची व्यवस्था संत तुकाराम महाराज संस्थानने केली आहे. भाविकांच्या सुरक्षिततेसाठी संस्थानच्या वतीने मुख्य देऊळवाड्यात आणि बाहेर सीसीटीव्ही कॅमेरे बसविले आहेत.

पालखी सोहळा प्रमुख सुनील दामोदर मोरे यांनी सांगितले, आषाढी वारीत संत तुकाराम महाराज पालखी सोहळ्यात ३३० दिंड्या आहेत. या दिंड्यांना संस्थानने पत्रव्यवहार केला आहे. दोन दिवसांत दिंड्या देहूत दाखल होतील. संपूर्ण सोहळ्यात भाविकांचे श्रद्धास्थान असलेला संत तुकाराम महाराजांच्या चांदीच्या रथाचे दुरुस्तीचे काम संस्थानने देऊळवाड्यात केले आहे. पालखी रथाला बैलजोडी जुंपण्यासाठी दोन शेतकऱ्यांना मान देण्यात आला आहे. त्याचप्रमाणे पालखी मार्गावर रथावरील गर्दी कमी करण्यात येणार आहे. भाविकांना पालखी मार्गावर संत तुकाराम महाराजांच्या पादुकांचे दर्शन व्यवस्थित व्हावे, यासाठी खास सोय करण्यात आली आहे. 

सुरक्षिततेच्या दृष्टीने रथावर चार कॅमेरे बसविण्यात आले आहे. भाविकांना पालखी मार्गावर विविध सोयीसुविधा उपलब्ध व्हाव्यात यासाठी शासनाच्या पाणी, आरोग्य, वीज, रस्ते विभागाला पत्रव्यवहार केला आहे. त्याचप्रमाणे पालखी मार्गावर निवाऱ्यासाठी तंबूची व्यवस्था केली आहे. पालखी मार्गावरील अन्नदानासाठी लागणारे साहित्य खरेदी करण्यात आले आहे. टाळ, मृदंग, पखवाज, वीणा व पूजेच्या साहित्याची खरेदी करण्यात आली असून, मानकरी सेवेकरी, दिंडी प्रमुखांना पत्र्यव्यवहार केला आहे. मुख्य देऊळवाड्यातील स्वच्छतेसाठी ५० कर्मचारी व ६ सुरक्षारक्षकही तैनात करण्यात आले आहेत. महाद्वारातून पालखी प्रस्थानाच्या दिवशी दिंड्यांना प्रवेश देण्यात येणार असून, तपोनिधी नारायण महाराज प्रवेशद्वारातून बाहेर जाण्याचा मार्ग आहे. सुरक्षिततेसाठी देऊळवाड्यात २२ कॅमेरे बसविण्यात आले आहेत. तसेच वैकुंठस्थानी चार कॅमेरे बसविले आहेत. मंदिराला फुलांची सजावट करण्यात येणार आहे. त्याचप्रमाणे चांदीच्या रथाला, अब्दागिरी, गरुडटक्के यांना मंगळवारी (ता. ३) पॉलिश करण्यात येणार आहे. पालखी सोहळ्यासाठी संस्थानच्या वतीने गाथा उपलब्ध करण्यात आल्या आहेत. मंदिराला यंदा दगडी स्वरूपात भाविकांना पाहावयास मिळणार आहे. संस्थानचे अध्यक्ष बाळासाहेब मोरे, पालखी सोहळा प्रमुख अशोक मोरे, विठ्ठल महाराज मोरे, विश्वस्त सुनील मोरे, अभिजित मोरे, जालिंदर महाराज मोरे उपस्थित होते.

Web Title: #SaathChal Pandharichi Wari Palkhi Tukaram Maharaj