प्रॅक्‍टिस! (ढिंग टांग)

प्रॅक्‍टिस! (ढिंग टांग)

स्थळ : मातोश्री महाल, वांद्रे संस्थान. वेळ : गडगडाट!
काळ : खडखडाट!          प्रसंग : तडफडाट!
पात्रे : सकलगुणालंकृत सौभाग्यवती कमळाबाई आणि राजाधिराज उधोजीमहाराज.

वातावरण कमालीचे तणावग्रस्त आहे. कमळाबाई आपल्या अंत:पुरात कुणाची तरी वाट पाहत आहेत. कुणाची तरी म्हंजे उधोजीराजांची! पण ह्यावेळी त्यांच्या हातात छडी आहे. अधूनमधून त्या लोड-तक्‍क्‍यांवर चालवून प्रॅक्‍टिस करत आहेत. तोंडाने ‘छम छम’ असा आवाज काढत आहेत - छडीतून मात्र घमघम असा आवाज येतो आहे! तेवढ्यात उधोजीराजे प्रवेश करतात. अब आगे...
उधोजीराजे : (चकित) हे काय हातात? माथेरानची छडी?
कमळाबाई : (छडीशी चाळा करत) बसा!
उधोजीराजे : (मटकन बसत) पाणी घ्या, जरा गिलासभर...
कमळाबाई : (खडसावून) हुकूमशहा कोण?
उधोजीराजे : (कोरड्या जिभेने) प...प...पाणी मिळेल का?
कमळाबाई : (भिवया वक्र...) आधी सांगा, हुकूमशहा कोण?
उधोजीराजे : (जीभ फिरवत) आम्हाला काय म्हाईत?
कमळाबाई : (जाब विचारल्यागत) देश सध्या हुकूमशाहीकडे चालला आहे, असं कोणाला उद्देशून म्हणालात? सांगा!!
उधोजीराजे : ते..ते होय! ते आपलं असंच म्हटलं होतं! असं काही बोललं की लोकांना बरं वाटतं!
कमळाबाई : (चिडून) माताभगिनींनी पुरचुंडीत साठवलेला पैसा हुडकायला माणसं आली की त्यांना मसाल्याच्या डब्यात ढकला, असं कोण म्हणालं? बोला!!
उधोजीराजे : (क्षीण आवाजात) तो विनोद केला होता हो आम्ही!
कमळाबाई : (छडी उगारत) ह्याला विनोद म्हणतात? विनोद फक्‍त तावडेंना म्हणतात!!
उधोजीराजे : (पडेल चेहऱ्यानं) बरं ऱ्हायलं! 
कमळाबाई : (छडी उगारत) उठा!...
उधोजीराजे : (अनवधानानं) ओऽऽ...
कमळाबाई : (खडसावून) उठा म्हणते ना! ‘ओ’ कसले देताय?
उधोजीराजे : (खुलासा करत) मला वाटलं मला हाक मारताय!!
कमळाबाई : (जरबेने) जुमल्यांवर इमले कोणी बांधले?
उधोजीराजे : (हात पसरून) असेल कोणी बिल्डर फिल्डर! आम्हाला कसं कळणार?
कमळाबाई : (आणखी जरबेने) गरिबांकडे पैसा यावा म्हणून आम्ही नोटाबंदी केली! पाठिंबा देणं राहिलं बाजूला, ‘फाडून ठेवलंय, शिवायचं कोणी?’ असं का विचारलंत?
उधोजीराजे : (खुलाश्‍याचा दुबळा प्रयत्न करत) अहो, ते आम्ही आमच्या सुरवारीबद्दल बोलत होतो!! नोटाबंदीबद्दल नाही!! तुमच्या हरेक गोष्टीला पाठिंबा देण्यासाठीच आम्ही उभे आहोत इथं!! पण सुरवार तर शाबूत ऱ्हायली पायजे ना!!
कमळाबाई : (संतापानं) तोंडावर गोड बोलायचं आणि पाठीमागे हे असलं अचकट-विचकट!! शोभतं का तुम्हाला?
उधोजीराजे : (समजुतीच्या सुरात) अहो, ती मर्दाची भाषा आहे, ती रांगडीच असणार! 
कमळाबाई : (निर्वाणीच्या सुरात) आम्हाला हुकूमशहा म्हंटा?
उधोजीराजे : (मान हलवत) छे, तुम्ही कुठल्या हुकूमशहा? तुम्ही अमितशहा आहात ना!!
कमळाबाई : (पदर खोचून भेदकपणे) शेवटचं सांगतेय! एका घरात ऱ्हायचं आणि घरातल्यांवर टीका करत हिंडायचं बंद केलं नाहीत तर... तुमचा मार्ग वेगळा, माझा वेगळा!!
उधोजीराजे : (आनंदाची उकळी फुटून) खर्रर्र सांगताय...की हासुद्धा आपला नुसता चुनावी जुमला?
कमळाबाई : (पदर पुन्हा खोचून चेवात) आम्ही कपट कारस्थानं करतो?
उधोजीराजे : (खोल आवाजात) असं आम्ही कधी म्हणालो?
कमळाबाई : (संतापातिरेकानं) मग ‘हिंमत असेल तर समोरासमोर या,’ असं कोणाला म्हणालात? ही मी आल्ये...बोला, काय इरादा आहे? हुकूमशहा काय, चुनावी जुमले काय, भूलथापा काय, हिमतीची भाषा काय... कुठे बोललात हे सगळं?
उधोजीराजे : (कबुली देत) आरशासमोर उभं राहून भाषणाची प्रॅक्‍टिस करत होतो... बोलणारे आम्ही, ऐकणारेही आम्हीच! जगदंब जगदंब!

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com