दिवा! (ढिंग टांग!)

dhing tang
dhing tang
कुठे दिवाळी ऐन भरातील
उच्छावाचा कैफ अनावर
लखलखणाऱ्या लक्ष दिव्यांची
कुठे उगवते पहाट मंथर

कुठे दिवाळी अस्मानातील
आतिषबाजी आणिक धूर
सुग्रासाच्या मेजावरती
ऐन सुगीला येतो पूर

कुठे दिवाळी ठुमकत येते
अचूक उतरते गात्री गात्री
नवी नवेली नवथर बाला
जणू जागते रोशन रात्री

कुठे दिवाळी कात टाकते
अन दैवाला फुटतो घाम
राधेला पाहून कसा रे
धून विसरतो मेघ:श्‍याम

कुठे दिवाळी तेल नि उटणे
आंघोळीची पुरी बादली
निरांजनाच्या तबकामागे
मांगल्याची ज्योत तेवली

कुठे दिवाळी मजेत म्हणते
वर्षभराची विसरा वणवण
गिळून आवंढा देहीं फासा
दर्वळणारा मोती साबण

कुठे दिवाळी उगीच येते
हौसेलाही नसते मोल
सालाबादी तशीही फिरते
सूर्याभवती पृथ्वी गोल

कुठे दिवाळी, सर्द फटाके
लक्ष्मीलाही होतो तोटा
रोज मोजतो चाकरमानी
जेबेमधल्या कमीच नोटा

कुठे दिवाळी बोनसवाली
नवीन कपडे नवी सायकल
सणासुदीच्या नावाखाली
उसनवारीची सदैव फतकल

कुठे दिवाळी अंधाराशी
भिंतीवरती घेते टकरा
मुकी बहाले, मौन उंबरे
अवकाळीच्या साहती चकरा

सज्जामधल्या खिळ्यास कुठल्या
लटकावा हा वार्षिक कंदील
लुकलुकणाऱ्या चंट दिव्यांची
माळ कुठेशी लावू बुझदिल

दारापुढती तेवत पणती
रांगोळीची आळशी पखरण
फणा डोलवित देत इशारे
दारावरचे उगाच तोरण

कुठे प्लगातच वीज निमाली
कुठे हरवले सहा ऋतु
विरुन गेला पदरकाठ पण
जपून ठेवितो कलाबतू

अभावातली भावदिवाळी
कुठे कुठे पण नभिं असू दे
फराळातल्या भरल्या ताटीं
उणीवांचेही भान असू दे

घोर तमाच्या कृष्णसागरी
माणुसकीचे असते द्विप
तिथेहि ठेवा एखादा पण
ऊरातला तो मंगलदीप!
...दिवाळीच्या शुभेच्छा!!

-ब्रिटिश नंदी
...................................

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com