बालदिन स्पेशल! (ढिंग टांग)

बाई : (वर्गात सर्वांना चूप करत) मुलांनो, देवासारखे गप्प बसा पाहू!..हं. आज काय आहे मुलांनो? 
मुले : (एकसुरात) बालदिन! 
बाई : (समाधानाने) शाब्बास! आज किनई तुम्हाला भेटायला एक मोठ्ठे पाहुणे येणार आहेत बरं का!! त्यांचं स्वागत करायचं हं!! ते स्वत: खूप छान गायकही आहेत!! 
चिंटू : (नाक पुसत) मोदीजी येणारेत? ही चिंगी म्हंटे की तेच खरे चाचा आहेत! 
चिंगी : (नाक वर करून)...होयच मुळी!! मी टीव्हीवर पाह्यलंय!! 
बाई : (संयमानं) नाही हं! ते सध्या फॉरीनला गेलेत!! पण आपले पाहुणेसुद्धा खूप मोठे कलाकार आहेत!! 
मंग्या : (ठामपणाने) म्हंजे आमीर खान असणार!! 
बाई : (संयमाची पराकाष्ठा) हे बघा, ते महाराष्ट्राचे मुख्यमंत्री पण आहेत हं!! 
चिंटू : (निरागसपणाने) खरे खरे की खोटे खोटे? ग्यादरिंगला हा रंग्या मुख्यमंत्री झाला होता ना, तेव्हा त्यानं उगीच रुबाब केला होता!! 
बाई : (पोक्‍तपणाने) ते आले की त्यांना पटापट प्रश्‍न विचारा हं! ह्या शाळेतली मुलं हुश्‍शार आहेत, असं वाटलं पाह्यजे त्यांना! कळलं? (तेवढ्यात तुतारी वाजते. मुख्यमंत्री येतात. बाई खूण करतात...) 
मुले : (एका सुरात) एकसाथ नमस्ते!! 
मुख्यमंत्री : (हसतमुखाने) नमस्ते नमस्ते! मुलांनो, तुम्हाला बालदिनाच्या शुभेच्छा बरं का!! बालदिनानिमित्त तुम्हाला आमच्यातर्फे एकेक गुलाबाचं फूल आणि गोल गरगरीत पेढा मिळेल!! 
चिंटू : (कमालीच्या निरागसतेने) पण त्यासाठी आधार कार्ड लागेल का? 
मुख्यमंत्री : (काळजाचे पाणी होत) नाही रे मुलांनो! थोडा वेळ लागेल इतकंच! मुलांच्या याद्या पूर्ण झाल्या की लग्गेच वाटू हं फुलं आणि पेढे! 
चिंगी : (गोड आवाजात) म्हंजे तुमच्या कर्जमाफीसारखंच ना? (पोरं हलकल्लोळ करतात. बाई सगळ्यांना चूप करतात) 
चिंटू : (नम्रतेने) तुम्हाला खूप आवडतो ना पेढा? आम्हाला नाय आवडत! 
मुख्यमंत्री : (खोल आवाजात) खूप आवडतो, पण मी खात नाही!! जी गोष्ट आवडते, ती सतत खावी, असं नसतं मुलांनो!! तुम्ही काय खाता? 
मुले : (एका सुरात) नूडल्स!! 
मुख्यमंत्री : (विषय बदलत) तुमचे पुढचे प्रश्‍न विचारा बरं! 
रंग्या : (हाताची घडी घालून चौकशीच्या सुरात) तुम्ही गाणी म्हणता म्हणे? 
मुख्यमंत्री : (ओशाळून) आधी म्हणायचो, हल्ली आवाज नीट लागत नाही म्हणून... 
रंग्या : (फर्माइश करत) "शांताबाई'चं गाणं म्हणून दाखवा!! (इथे मुख्यमंत्री सटपटतात. "वाचवा' अशा नजरेने बाईंकडे काकुळतीने पाहतात.) 
बाई : (घाईघाईने) आपल्या पाहुण्यांना वेळ नाहीए फारसा मुलांनो! वेळात वेळ काढून ते आले आहेत! त्यांना जरा चांगले प्रश्‍न विचारा बरं! कोण विचारेल...हं, चिंटू तूच विचार!! 
चिंटू : (पोक्‍तपणाने) मंत्रिमंडळ विस्तार कधी करणार? 
मुख्यमंत्री : (अनवधानाने) हिवाळी अधिवेशनाच्या आसपास करू!! (चिंटूचे नाक ओढत) तुला का रे चौकश्‍या लब्बाडा? 
चिंगी : (मधूनच ओरडत) बाई, हा रंग्या आवशीक खाव म्हणतो! त्याला ओरडा!! 
बाई : (डोळे वटारून) मास्टर श्रीरंग, बीहेव युवरसेल्फ बरं!! मंत्रिमंडळ विस्ताराचा विषय निघाला की तू असंच बोलतोस नेहमी! दॅट्‌स रॉंग!! कोकणातला असलास म्हणून काय झालं? 
मुख्यमंत्री : (उमदेपणाने) जाऊ द्या हो बाई, आज तरी नका ओरडू मुलांना!! 
चिंटू : (उग्र सुरात) प्लीज बी स्पेसिफिक, सर! मंत्रिमंडळाचा विस्तार हिवाळी अधिवेशनाच्या आधी की नंतर? 
मुख्यमंत्री : (गोरेमोरे होत) लहान मुलांनी आपल्या वयाला शोभेलसे प्रश्‍न विचारावेत बाळा!! 
रंग्या : (डेडली पॉज घेत) ठीक आहे, नागपुरात संत्र्याचा सीझन कधी असतो? 
मुख्यमंत्री : (खजील सुरात) हिवाळी अधिवेशनानंतरच! 
चिंटू : (विरोधी पक्षनेत्यासारखे) काय हिवाळी अधिवेशनानंतर? मंत्रिमंडळ विस्तार की संत्र्याचा सीझन? 
मुख्यमंत्री : (चतुराईने) दोन्हीही!! जय महाराष्ट्र!