वापसी ! (ढिंग टांग)

बेटा : (सळसळत्या उत्साहात) ढॅणटढॅऽऽण...मम्मा, आयॅम बॅक ! आय मीन बॅक फ्रॉम इटोळी !!
मम्मामॅडम : (भुवया उंचावत) इटोळी? म्हंजे?
बेटा : म्हंजे इटलीतल्या आजोळी... इट्‌स नोन ॲज इटोळी नाऊ !
मम्मामॅडम : (सुटकेचा निःश्‍वास टाकत) थॅंक गॉड ! परत आलास, किती बरं वाटलं! मला वाटलं याही वेळेला तू छप्पन दिवस गायब होणार !!
बेटा : (निषेधाच्या सुरात) कमॉन ! तीन दिवसांसाठी तर गेलो होतो !! जादा सुटी लागून आली की कितीतरी लोक वीकेंडला टूरवर जातात ! मी का जाऊ नये?
मम्मामॅडम : तू शिवभक्‍त ना? मग होळीलाच कसा काय पळालास?
बेटा : इटलीत होळी साजरी करत नाहीत, असं कोणी सांगितलं?
मम्मामॅडम : (अजीजीने) जेव्हा आपल्या कार्यकर्त्यांना आपली सर्वांत जास्त गरज असते, तेव्हा जाऊ नये रे ! किती वाट पाहायला लावलीस !!
बेटा : (बेफिकीरपणाने)...त्यात वाट कसली पाह्यची?
मम्मामॅडम : (दु:खी कढ काढत) वाट लागली की वाट पाहावी लागते बेटा !
बेटा : (कुतूहलानं) कुणाची वाट लागली?
मम्मामॅडम : (कळवळून) आज्जीला भेटायला जातो, म्हणून तू निघून गेलास ! इथं तीन दिवस मला शेकडो फोन घ्यावे लागले ! ‘मॅडमजी बचाव, मॅडमजी बचाव’ म्हणत लोक दारावर धडकत होते !
बेटा : (आश्‍चर्यानं) अच्छा? मग तू काय सांगितलंस?
मम्मामॅडम : (कपाळ चोळत) काय सांगणार? ‘मी आता रिटायर झाल्येय’ असंच सांगत होते !! (विषय बदलत) ते जाऊ दे ! इटलीची काय हालहवाल?
बेटा : (उजळलेल्या चेहऱ्यानं) तेच सांगायला आलो होतो ! आज्जीनं पापड, कुर्डया दिल्या आहेत ! म्हणाली, माझ्या मुलीला दे हो !! थोडा थांबलास तर लिंबाचं लोणचं भरून देते, असंही म्हणत होती ! पण मी म्हटलं, आत्ता वेळ नाही... कर्नाटकचं इलेक्‍शन झालं की येणारच्चे ! तेव्हा दे !!
मम्मामॅडम : (वैतागून) कर्नाटक निवडणुकीनंतर कुठे गेलास तर खबरदार ! त्रिपुरा, मेघालय, नागालॅंडच्या निवडणुकांनंतर ऐन निकालाच्या वेळी पसार झालास ! मला सगळ्या गोंधळाला तोंड द्यावं लागलं !
बेटा : (सावरून घेत) पण पोटनिवडणुका जिंकून मगच गेलो होतो मी !!
मम्मामॅडम : (कळवळून) पोटनिवडणुका जिंकून कुणाचं पोट भरतं का रे !! ते काही नाही !! कर्नाटकनंतर मी तुला कुठ्ठेही जाऊ देणार नाहीए !
बेटा : (चिडून) पण मी आधीच सुटीचा अर्ज टाकलाय !
मम्मामॅडम : तुझा अर्ज प्राप्त झालेला नाही ! सबब, सुटी मिळणार नाही !!
बेटा : (चक्रावून) पण मी तुझ्याकडे अर्ज पाठवलेलाच नाही ! मी मलाच पाठवला ! आता मी बॉस आहे ना?
मम्मामॅडम : (हतबुद्ध होत) ऐनवेळी पळ काढून गेलास म्हणून ते नतद्रष्ट कमळवाले किती नावं ठेवताहेत, हे ऐकायला हवा होतास इथं !! मला तोंड पाडून ऐकून घ्यावं लागलं ! एकतर त्रिपुरातल्या पराभवामुळे आधीच माझं मन... (हुंदका आवरत) जाऊ दे ! तुला नाहीच समजायच्या माझ्या भावना !!
बेटा : कमॉन... त्रिपुरातील पराभव आम्ही स्वीकारला असून, तेथील जनतेचा विश्‍वास पुन्हा जिंकून घेऊ, असं मी आल्या आल्या जाहीर केलं होतं ! पुढच्या इलेक्‍शनला करू काय ते !! आहे काय नि नाही काय !!
मम्मामॅडम : (कपाळाला हात मारत) कधी होणार तू सीरिअस? काळ कठीण आहे ! तुला खूप मेहनत करायला हवी ! इलेक्‍शनांमागून इलेक्‍शनं जिंकायला हवी ! नाहीतर...
बेटा : (हसत) डोण्ट वरी मम्मा ! मी पीएम झालो की बघच तू ! मीच सतत जिंकत राहणार ! पीएम झाल्यावर मी ऑर्डरच काढणार आहे की ह्या देशात फक्‍त पोटनिवडणुकाच होतील !! मग मी जिंकणारच ना !! क्‍यों?