रिटर्न गिफ्ट ! (ढिंग टांग!)

Pune Edition Article on Return Gift in Dhing Tang
Pune Edition Article on Return Gift in Dhing Tang

विक्रमादित्य : (लपतछपत खोलीत शिरत मोठ्यांदा) हॅप्पी बर्थडे ट्यू यू... हॅप्पी बर्थ डे च्यू यूऽऽ... हॅपी बऽऽथडे च्यू यूऽऽ... हॅप्पी बर्थडे..च्यूऽऽ...यूऽऽऽ.... 
उधोजीसाहेब : (अंथरुणात दचकून बसत) काय झालं? काय झालं? हल्ला, हल्ला...हर हर हर हर महादेव!! 
विक्रमादित्य : (कमरेवर हात ठेवत) ह्याला काय अर्थय बॅब्स! 
उधोजीसाहेब : (डोळे चोळत) आरडाओरडा कसला झाला? 
विक्रमादित्य : (खुलासा करत) बॅब्स... तुमच्या बर्थडेचं सेलेब्रेशन सुरू झालं! आम्ही तुम्हाला विश करायला आलो, तर दचकता काय? 

उधोजीसाहेब : (ओशाळून) ओह!...अरे, ही काय वेळ आहे का विश करण्याची! बारा वाजलेत, बारा! झोपा आता गपचूप! उद्या बघू... वाढदिवस उद्या आहे, उद्या! 
विक्रमादित्य : (कुरकुरत) रात्री बाराला सुरू होतो ना दिवस? 
उधोजीसाहेब : (मान हलवत) नाही... रात्री बाराला मध्यरात्र सुरू होते!! कळलं? जा आता! बाय द वे, थॅंक यू फॉर युअर विशेस! (पुन्हा पांघरुणात शिरतात...) 

विक्रमादित्य : (हिरमोड होत) मग आम्ही केक कधी कापणार? 
उधोजीसाहेब : (पांघरुण डोक्‍यावर घेत) उद्या!... सकाळी अकरा ते सायंकाळी पाच ह्या कार्यालयीन वेळेतच केक कापणेत येईल, तसेच अभीष्टचिंतनाचा स्वीकार होईल, ह्याची सर्व संबंधितांनी नोंद घ्यावी! गुडनाइट!! 

विक्रमादित्य : (मुद्दाम उकरून काढत) तुमच्या म्यारेथॉन मुलाखतीबद्दल एक शंका आहे!! 
उधोजीसाहेब : (डोक्‍यावरील पांघरुणातूनच) घुर्रर्रर्र...!! 
विक्रमादित्य : (अचंब्याने) जीडीपी म्हंजे काय ते आपल्याला माहीत नाही? असं तुम्ही म्हणालात का? कमाल आहे तुमची! साधा जीडीपी म्हंजे काय ते ठाऊक नाही तुम्हाला? 
उधोजीसाहेब : (डोक्‍यावरून पांघरुण फेकत त्वेषानं) जीडीपी कसा दिसतो? कुठे उगवतो? कुठे वाढतो? कुणी पाहिलाय? 
विक्रमादित्य : (किंचित हसून) अहो, कॉमर्सला शिकवतात जीडीपी म्हंजे काय ते! जीडीपी म्हंजे... जीडीपी म्हंजे...अं...अं....जी फॉर ग्रॉस- 
उधोजीसाहेब : (धीर देत) राहू दे, राहू दे! ज्या गोष्टीचा फोटो काढता येत नाही, अशा कुठल्याही गोष्टीवर माझा विश्‍वास नाही! कळलं? जा आता!! 

विक्रमादित्य : (शिताफीने विषय बदलत) तुम्ही अयोध्येला जाणार आहात? 
उधोजीसाहेब : (कानटोपी चढवत) अलबत! कुणाला भीतो की काय!! अयोध्याच काय, काशीत पण जाणार आहे!! 
विक्रमादित्य : (अविश्‍वासानं) स्वत:हून कुणी काशीत जातं का, बॅब्स! पण रथातून जाणार असाल तर मी पण येणार!! 
उधोजीसाहेब : (कळवळून) झोपू दे ना मला! उद्या ऑफिस टाइममध्ये उभं राहायचंय मला कंप्लीट! किती लोक शुभेच्छा द्यायला येतील, कल्पना आहे? शिवाय उद्या गुरुपौर्णिमाही आहे! म्हंजे दुप्पट गर्दी!! छे!! 

विक्रमादित्य : (गंभीर होत) वाढदिवस साधेपणानं साजरा करावा! शक्‍यतो घरगुती स्वरूपाचाच करावा! होर्डिंग, फलक लावू नयेत! त्यामुळे पर्यावरणाची हानी होते! प्लास्टिकचा वापर टाळावा!...हो ना बॅब्स!! 
उधोजीसाहेब : (खुश होत) करेक्‍ट! 

विक्रमादित्य : (हळू आवाजात) बॅब्स, उद्या गर्दी होईल म्हणून देवेंद्र अंकलनी आत्ताच केक पाठवलाय! कापू या? 
उधोजीसाहेब : (दचकून उठत) क्‍काय? बाप रे! ही काय नवी भानगड? 
विक्रमादित्य : (समजावून सांगत) ते पहाटे तीनपर्यंत जागून महाराष्ट्राचा कारभार करतात! म्हणून त्यांनी आत्ताच पाठवलाय केक! 
उधोजीसाहेब : (डोळे बारीक करत) ह्यात मला काहीतरी काळंबेरं दिसतंय! 
विक्रमादित्य : (निरागसपणाने) नाही! काळंबेरं काही नाही!! कमळाच्या आकाराचा केसरिया केक आहे! रिटर्न गिफ्ट म्हणून आपण काय पाठवूया बॅब्स? 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com