वाई-पाचगणी मार्गावर पसरणी घाटात बस जाळून खाक

वाई (सातारा) : पसरणी घाटात आज एका खाजगी बसने अचानक पेट घेतला. वाई- पाचगणी रस्त्यावर नागेवाडी फाट्याजवळ दुपारी तीनच्या सुमारास ही घटना घडली. सुदैवाने या दुर्घटनेत कोणतीही जीवित हानी झाली नाही.मात्र प्रवाशांच्या साहित्यासह संपूर्ण बस जाळून खाक झाली.रविवारी सुट्टीचा दिवस असल्याने पसरणी घाटात वाहतूक मोठ्या प्रमाणात होती. (Satara Accident News)

माणगांव (गोरेगांव) ता.महाड येथील खाजगी कंपनी मधील काही कर्मचारी खाजगी लक्झरी बस (क्र.एम एच -०६ एस ९३५४) ने पंढरपूरला दर्शनासाठी गेले होते. आज सकाळी पंढरपूरहुन निघून मांढरदेवीमार्गे महाबळेश्वरला निघाले होते. पसरणी घाटात नागेवाडी फाटा (सोळा नंबर स्टॉप) येथे बस आली त्यावेळी शेजारून जाणाऱ्या वाहन चालकाने बसमधून धूर येत असल्याचे चालकास सांगून सतर्क केले.

चालक रवींद्र कोळसकर (वय ४७ वर्षे रा.माणगांव) यांनी प्रसंगावधान ओळखून बस रस्त्याच्या कडेला उभी करून गाडीतील सर्व प्रवाशी खाली उतरविले.त्यामुळे पुढील अनर्थ टाळला.या बसमध्ये लहान मुलांसह ३९ प्रवाशी होते. या घटनेची माहिती मिळताच वाई व पांचगणी पोलीस ठाण्याचे अधिकारी-कर्मचारी घटनास्थळी दाखल झाले. त्यांनी घटनेचे गांभीर्य ओळखून वाई-पाचगणी अग्निशमन बंबाला पाचारण केले. वाई पालिकेच्या अग्निशमन बंबाने आग विझविण्याचे प्रयन्त केला. दरम्यान संपूर्ण बस जाळून खाक झाली. या घटनेमुळे वाई-पाचगणी रस्त्यावर दोन्ही बाजूला वाहनांच्या मोठ्या रांगा लागल्याने काही काळ वाहतूक विस्कळीत झाली होती.बस विझविल्या नंतर पोलीसांनी वाहतूक सुरळीत केली.