जळगाव जिल्ह्यातून 12 हजार टन केळी निर्यात 

रावेर - जिल्ह्यातील निर्यात होणारे, शेतकऱ्यांना बऱ्यापैकी उत्पन्न मिळवून देणारे पीक म्हणजे केळी आहे. या वर्षी जिल्ह्यातील सुमारे सहाशे कंटेनर म्हणजे 15 कोटी रुपयांची बारा हजार टन केळी निर्यात झाली आहे. आगामी काळात ही निर्यात वाढणार आहे. निर्यातीत रावेर तालुक्‍याचा वाटा 70 टक्के आहे. 

मागील पाच-सात वर्षांपासून खानदेशी केळीला पाकिस्तानात चांगली बाजारपेठ मिळाली आहे. गेल्या दोन- तीन वर्षांत अरब राष्ट्रांत जिल्ह्यातील केळी निर्यात होत आहे. इराक, इराण, दुबई, अफगाणिस्तान आदी देशांत ही निर्यात समुद्रमार्गे होत आहे. केळी निर्यात दिवाळीनंतर सुरू होते ती जूनअखेरपर्यंत चालते. ऑक्‍टोबर 2017 ते जून 2018 याकाळात जिल्ह्यातून सुमारे 12 ते 15 निर्यातदार कंपन्यांनी 600 कंटेनर केळी निर्यात केली. रावेर तालुक्‍यातील तांदलवाडी, ऐनपूर, निंबोल, विटवा, केऱ्हाळे, अजनाड, अटवाडे, चोरवड, नेहता, दोधा, निरुळ, खानापूर या तापी पट्ट्यातील व दक्षिण पूर्व भागातील शेतकऱ्यांचा वाटा मोठा आहे. 

एका कंटेनरमध्ये 200 क्विंटल म्हणजे 20 टन केळी निर्यात होते. कंटेनर वातानुकूलित असतात. केळीची काळजीपूर्वक हाताळणी करून बॉक्‍समध्ये केळी भरून निर्यात होते. जिल्ह्यात निर्यातक्षम केळी उत्पादन वाढत आहे. आगामी वर्षात ही निर्यात एक हजार कंटेनरपर्यंत नेण्याचा निर्धार युवा शेतकरी व्यक्त करीत आहेत. 

युवक शेतकऱ्यांनी नवे तंत्रज्ञान आत्मसात केले आहे. निर्यातक्षम, दर्जेदार केळी उत्पादन करण्याचे ध्येय गाठण्यासाठी केळी तज्ज्ञ के. बी. पाटील यांचे मार्गदर्शन मिळते. या वर्षी तालुक्‍याच्या दक्षिण पूर्व भागातील एक हजार टन केळी निर्यात झाली अशीच अनुकूल परिस्थिती राहिली तर या भागातून किमान पाच हजार टन केळी निर्यात करू. 
-विशाल अग्रवाल,  केळी उत्पादक शेतकरी, अटवाडा, ता. रावेर