तेली समाजाचा बागलाण तहसीलवर मूकमोर्चा 

सटाणा : दोंडाईचा (जि.धुळे) येथील तेली समाजाच्या अल्पवयीन मुलीवर बलात्कार करणारा नराधम व त्याला पाठीशी घालणाऱ्या नराधमांना फाशीची शिक्षा व्हावी, या मागणीसाठी बागलाण तालुका तेली समाजातर्फे आज (ता.२७) तहसील कार्यालयावर मूकमोर्चा काढून निवेदन देण्यात आले.

बागलाणचे उपविभागीय अधिकारी प्रवीण महाजन यांना दिलेल्या निवेदनाचा आशय असा : दोंडाईचा (जि.धुळे) येथील माध्यमिक शाळेत पाच वर्षीय बालिकेला चॉकलेटचे आमिष दाखवून शाळेच्या आवारात नराधमाने बलात्कार केला होता. घटनेनंतर नराधमास तात्काळ अटक करण्याऐवजी शाळेच्या संस्थाचालकांनी बलात्कारी नराधमाविरोधात गुन्हा दाखल करू नये यासाठी पिडीत मुलीच्या कुटुंबियांवर दबाव टाकण्याचा प्रयत्न केला. ही बाब अत्यंत संतापजनक व निंदनीय आहे. या प्रकारानंतर भयभीत झालेले पिडीत मुलीचे कुटुंबीयांनी गाव सोडले असून ते आपल्या मूळगावी जळगाव येथे सध्या राहत आहेत. या घटनेमुळे राज्यभरातील संपूर्ण तेली समाजामध्ये संतापाची लाट उसळली असून समाजबांधवांच्या भावना तीव्र आहेत. 

असे कृत्य करणाऱ्या नराधमास फाशी व्हावी आणि त्या नराधमास पाठीशी घालून त्याला मदत करणारे यांना या प्रकरणात सहआरोपी करावे, गुन्ह्याचा तपास सीआयडीकडे वर्ग करावा, पोसो कायद्यांतर्गत तपास व्हावा, खटला द्रुगती न्यायालयात चालवावा, विशेष सरकारी वकिलाची नियुक्ती करावी, पिडीत मुलीच्या कुटुंबियांना शासकीय धोरणानुसार तातडीने मदत मिळावी, पिडीत मुलीचा शैक्षणिक खर्च शासनाने करावा व भविष्यातील तिच्या नोकरीची हमी द्यावी, वैद्यकीय मदत देऊन पिडीतेच्या कुटुंबीयास पोलीस संरक्षण मिळावे तसेच पिडीत मुलीच्या पालकांवर दबाव टाकणारे संस्थाचालक, विद्यालयाचे प्रमुख व कर्मचाऱ्यांवर तात्काळ गुन्हा दाखल करावा, अशा मागण्याही निवेदनात नमूद करण्यात आल्या आहेत. 

मोर्चात बागलाण तालुका तेली समाजाचे अध्यक्ष दत्तात्रेय पवार, सचिव कैलास बोरसे, शहराध्यक्ष अरुण सोनवणे, उमेश गाडेकर, सुधाकर चौधरी, प्रकाश चौधरी, बाळासाहेब चौधरी, सुनील जाधव, किशोर जाधव, विश्वनाथ जाधव, राजाराम जाधव, सुनील बोरसे, शशिकांत बिरारी, गुलाब चित्ते आदींसह शेकडो समाजबांधव उपस्थित होते.