संतापजनक! कंत्राटी कर्मचारी महिलेकडे शरीर सुखाची मागणी

जळगाव : महावितरण कंपनीत करार पद्धतीवर कार्यरत महिलेकडे विभागातील एका वरिष्ठ कर्मचाऱ्याने शरीर सुखाची मागणी केली तर, दुसऱ्या एकाने गैरवर्तन करीत विनयभंग केल्याचा गंभीर प्रकार समोर आला. एमआयडीसी पोलिस ठाण्यात दोघा संशयितांविरुद्ध गुन्हा दाखल करण्यात आला आहे.

पीडिताने दिलेल्या तक्रारीत नमुद केल्याप्रमाणे, जळगाव महावितरण कार्यालयातील एका वरिष्ठाने विभागातील एका कंत्राटी महिला कर्मचारीकडे शरीर सुखाची मागणी केली. तक्रारदार महिलेच्या सांगण्याप्रमाणे तब्बल चार वर्षे (वर्ष २०१७ ते २०२१) हा प्रकार सुरूच होता. असे असताना १२ मे रोजी कार्यालयातील संबंधित कर्मचाऱ्याने पुन्हा महिला कर्मचारीकडे शरीरसुखाची मागणी करत गैरवर्तन केले. मागणी मान्य न झाल्याने मानसिक छळ व त्रास देत पीडितेला कामावरून काढून टाकण्यात आले. हे कमी की, काय म्हणून कार्यालयातील त्याचा साथीदार असलेल्या दुसऱ्या एका कर्मचाऱ्याने ‘मी तुला घरी सोडतो’ असे म्हणत पीडितेशी अंगलट केली. तिचा विनयभंग केला. पीडिताच्या तक्रारीवरून दोन्ही संशयितांविरुद्ध गुन्हा दाखल करण्यात आला असून गुन्ह्याचा तपास पोलिस उपनिरीक्षक निलेश गोसावी करीत आहे.

अटकेसाठी आंदोलन

महिला कर्मचाऱ्याशी गैरवर्तन करणाऱ्या संशयितांविरोधात जळगाव परिमंडळ महावितरण संयुक्त कृती समितीतर्फे द्वार सभा घेत घटनेचा निषेध व्यक्त करण्यात आला. तसेच संशयितांना अटक करण्याची मागणी केली आहे.