25 मिनिटात दुचाकी केली लंपास

जुने नाशिक : द्वारका कन्नमवार पूल परिसरातून पंचवीस मिनिटात दुचाकी चोरी झाल्याचा प्रकार घडला. या प्रकरणी भद्रकाली पोलिस ठाण्यात गुन्हा दाखल करण्यात आला आहे.

वडाळा- पाथर्डी रोड येथील रियाज शेख ऑफिसच्या कामानिमित्त सोमवारी (ता. ३०) कन्नमवार पूल येथील आनंद ट्रॅक्टर या ठिकाणी आले. परिसरातील पार्किंगमध्ये व्यवस्थित दुचाकी (MH-15-GD-9784) पार्क केली.

रात्री आठच्या सुमारास शेख आनंद ट्रॅक्टर दुकानात गेले. ८ वाजून २५ मिनिटांनी बाहेर आले असता, पार्क केलेल्या ठिकाणी दुचाकी आढळून आली नाही. शोध घेऊनही दुचाकी मिळून न आल्याने त्यांनी भद्रकाली पोलिस ठाण्यात गुन्हा दाखल केला.