गावाच्या विकासासाठी ‘मिळून सारे आम्ही’

नागपूर - रामटेक तालुक्‍यातील सखाराम कोडापे यांना महात्मा गांधी राष्ट्रीय ग्रामीण योजनेंतर्गत विहिरी मिळाली. पण, विहिरीतून पाण्याचा उपसा करण्यासाठी वीजजोडणी आणि कृषिपंप दोन वर्ष लोटूनही मिळाले नाही. यासाठी त्यांनी तिन्ही विभागांच्या पायऱ्या झिजविल्या. मात्र, जिल्हा प्रशासनाने तीन महिन्यांपूर्वी रामटेक तालुक्‍यात राबविलेल्या ‘मिळून सारे आम्ही’ उपक्रमात त्यांची समस्या मार्गी लागली. या उपक्रमाला उपजिल्हाधिकारी जायभाये यांनी दिली.

सखाराम यांच्यासारखे इतर लाभार्थ्यांचे प्रश्‍न ‘मिळून सारे आम्ही’ या उपक्रमाच्या माध्यमातून सुटू शकतात, ही बाब जिल्हाधिकारी सचिन कुर्वे यांच्या लक्षात आली. त्यानंतर रोहयोच्या उपजिल्हाधिकारी मनीषा जायभाये, कृषी विभागाचे उपविभागीय अधिकारी लाड यांच्या संकल्पनेतून विविध विभागांच्या योजना एकत्रितपणे राबविण्याचा निर्णय घेतला. यासाठी सर्वांत प्रथम आदिवासीबहुल रामटेक तालुक्‍याची निवड झाली. त्यानंतर एक फॉर्म तयार करून घेतला. यात ग्रामविकासापासून ते कृषीविषयक कोणत्या योजनांची गरज आहे याची माहिती गावकऱ्यांकडून भरून घेतली. ही माहिती संकलित करून गावनिहाय कोणत्या गावातील नागरिकांना कुठल्या योजनाची गरज आहे. याचा एकत्रित डाटा तयार झाला.

समस्यांच्या निराकरणासाठी ग्रामविकास, कृषी, समाजकल्याण, महिला बालकल्याण, पंचायत, वीज, महसूलसह इतर विभागांचे एकत्रित शिबिर घेण्यात आले. शिबिरात अनेकांच्या प्रश्‍नांची सोडवणूक जागेवरच झाली. नागरिकांनी अर्जामध्ये नमूद केलेल्या योजनेचा लाभ तेव्हाच मिळवून दिला. त्यामुळेच ‘मिळून सारे आम्ही’ हा उपक्रम सर्वांच्या जिव्हाळ्याचा झाला आहे. प्रशासनाने मनात आणले आणि ग्रामविकासाच्या सर्व योजना एकत्रित राबविल्या तर काय क्रांती घडू शकते, हे उपक्रमाने दाखवून दिले. ग्रामविकासाचा हा प्रयोग आता जिल्हाभरात राबविणार येणार आहे.