नागपुरी बोलीच्या नावावर टिंगलटवाळी !

नागपूर - एका वाहिनीवर नुकत्याच सुरू झालेल्या मालिकेत नागपुरी बोलीच्या नावावर अक्षरशः टिंगलटवाळी सुरू आहे. अशा पद्धतीचा अपमान खपवून घेतला जाणार नाही, असा इशारा प्रेक्षकांनी "सकाळ‘च्या माध्यमातून दिला आहे. सोशल मीडियावरदेखील यासंदर्भातील चर्चेत अतिशय आक्रमक भूमिका वैदर्भी प्रेक्षकांनी घेतली आहे.

यापूर्वी याच वाहिनीवर एका मालिकेत नागपूरचे पात्र दाखवून त्याच्या तोंडी भलतीच भाषा नागपूरच्या नावावर खपविण्यात आली. "सकाळ‘ने हा विषय लावून धरल्यानंतर निर्मात्याला ते पात्रच वगळावे लागले. पुन्हा असा प्रकार होणार नाही, असे अपेक्षित होते. मात्र, नागपूरच्याच लेखकाने लिहिलेल्या या मालिकेतील नटी अतिशय विचित्र पद्धतीने इकडची भाषा बोलतेय. मुळात नागपूरचे लोक अशी भाषा बोलतच नाहीत. नागपुरी किंवा वैदर्भी भाषेचा लहेजा यापेक्षा फार वेगळा आहे. पण, भाषेकडे दुर्लक्ष करण्याचा प्रकार सुरू आहे, असा आरोप प्रेक्षकांकडून होतोय. यापूर्वी स्व. विनय आपटे, अरुण नलावडे, मकरंद अनासपुरे यांच्यासारखे दिग्गज नटही वैदर्भी भाषा बोलताना दिसले. पण, त्यांनी भाषेचा अभ्यास करताना तडजोड केली नाही. या मालिकेतील "नवऱ्याची बायको‘ नागपूरचे पात्र म्हणून रंगविण्याचा प्रयत्न झाला आहे. एकतर तिची बोली नागपुरी नाही शिवाय ती नागपूरची म्हणून भाषा आणि वागण्यावरून तिची टिंगलटवाळीदेखील होतेय. "नागपूरच्या मुली एवढ्या मागास आहेत का?‘ असा सवाल काहींनी उपस्थित केला आहे. या मालिकेत "ट्‌वीस्ट‘ येणार, असा युक्तिवादही होतोय. म्हणून चुकीची बोली नागपूरच्या नावावर खपविण्याचे समर्थन करावे काय? "व्वा गुरू‘!