Ahmednagar : घोडेगावात कांद्याला दीड हजाराचा भाव

सोनई : नेवासे बाजार समितीच्या घोडेगाव (ता. नेवासे) उपबाजारात आज (रविवारी) ८० हजार ४६४ कांदा गोण्यांची विक्रमी आवक झाली. दीड हजार रुपयांच्या पुढे प्रतिक्विंटलला भाव मिळाल्याने शेतकऱ्यांनी समाधान व्यक्त केले.जून महिन्याच्या सुरुवातीपासून नगर, बीड, औरंगाबाद जिल्ह्यांतून मोठ्या प्रमाणात कांद्याची आवक होत आहे. मान्सूनचे आगमन वेळेत होऊनही वातावरणात उकाडा असल्याने चाळीत ठेवलेला कांदा खराब होईल, या भीतीने शेतकऱ्यांनी बाजारात कांदा आणला आहे. पेरणी खर्च, मुलांच्या शैक्षणिक खर्चासाठीही काही शेतकऱ्यांनी कांदा बाजारात आणला आहे.

आजच्या लिलावात एक नंबर कांद्यास पंधराशे ते सतराशे रुपये क्विंटलचा भाव मिळाला. मध्यम कांद्यास तेराशे ते पंधराशे रुपये,

गोल्टी कांद्यास पाचशे ते आठशे रुपये, तर जोड कांद्यास तिनशे ते सहाशे रुपये क्विंटलचा भाव मिळाला. लिलावात आलेल्या काही कांदा गोण्या दोन हजार रुपये क्विंटलने विकल्या गेल्या. लिलावानंतर कांदा ट्रकमध्ये भरण्यासाठी व्यापाऱ्यांची धावपळ उडाली. रात्री उशिरापर्यंत ४३५ ट्रक कांदा उपबाजारातून हलविण्यात आला.