पत्नीच्या डोक्‍यात पाटा घालून त्याने केली रेल्वेखाली आत्महत्या 

श्रीरामपूर : कौटुंबिक वादातून शहरालगतच्या दत्तनगरमध्ये घरात झोपलेल्या पत्नीच्या डोक्‍यात आज दुपारी पाटा घालून पतीने रात्री आठच्या सुमारास रेल्वेखाली उडी मारून आत्महत्या केली. राजन गायकवाड असे मृताचे नाव आहे. त्याची पत्नी शिल्पा राजन गायकवाड (वय 21) या घटनेत गंभीर जखमी झाली असून, तिच्यावर लोणी येथील प्रवरा ग्रामीण रुग्णालयात उपचार सुरू आहेत. सध्या तिचीही प्रकृती चिंताजनक असल्याची माहिती वैद्यकीय सूत्रांनी दिली. 

हेही वाचा अरे देवा... नगर शंभरीकडे, कोरोनाबाधितांचा सिलसिला सुरूच 

मिळालेल्या माहितीनुसार, दत्तनगर येथील घरात आज दुपारी तीनच्या सुमारास शिल्पा गायकवाड झोपली होती. त्या वेळी कौटुंबिक वादातून पती राजन याने तिच्या डोक्‍यात पाटा घातला. त्यात ती गंभीर जखमी झाली. तिचा आरडाओरडा ऐकून शेजाऱ्यांनी मदतीसाठी धाव घेतली. सरपंच सुनील शिरसाठ यांच्यासह नागरिकांनी तिला सुरवातीला येथील साखर कामगार रुग्णालयात दाखल केले. मात्र, प्रकृती गंभीर असल्याने तिला लोणी येथील प्रवरा ग्रामीण रुग्णालयात हलविण्यात आले. सध्या तिची प्रकृती चिंताजनक आहे. 

आवश्‍य वाचा कोरोनाग्रस्ताचा नातेवाईकच मटका बुकी... चिठ्ठीसोबत 

दरम्यान, आज रात्री आठच्या सुमारास शिल्पा हिचे पती राजन गायकवाड याने सूतगिरणी परिसरात रेल्वेखाली उडी मारून आत्महत्या केली. याबाबत माहिती मिळताच पोलिसांनी घटनास्थळी धाव घेतली व मृतदेह ताब्यात घेतला. त्यांच्या मागे दोन मुली आहेत. जिल्हा परिषदेचे माजी सदस्य वसंत क्षीरसागर यांची शिल्पा पुतणी आहे. याबाबत उशिरापर्यंत शहर पोलिस ठाण्यात गुन्ह्याची नोंद झाली नव्हती.