डॉ. विजय मकासरे यांच्याविरूद्ध सरकारी कामात अडथळा आणल्याचा गुन्हा

राहुरी : समन्स बजाविण्यासाठी आलेल्या श्रीरामपूर शहर पोलिस ठाण्यातील कर्मचाऱ्यास अरेरावी व शिवीगाळ केल्याप्रकरणी वळण (ता. राहुरी) येथील सामाजिक कार्यकर्ते डॉ. विजय मकासरे यांच्याविरुद्ध राहुरी पोलिस ठाण्यात सरकारी कामात अडथळा आणल्याचा गुन्हा दाखल झाला. 

श्रीरामपूर पोलिस ठाण्यातील कर्मचारी संदीप कमलाकर कानडे यांनी मकासरे यांच्याविरुद्ध राहुरी पोलिस ठाण्यात फिर्याद दिली. तीत म्हटले आहे, की रविवारी (ता. 18) सकाळी 10 वाजता मकासरे यांना समन्स बजाविण्यासाठी वळण येथील त्यांच्या घरी गेलो होतो. त्यावेळी मकासरे यांनी समन्स घेण्यास नकार दिला. अरेरावी केली. काही वेळाने समन्सवर सही करतानाही शिवीगाळ करीत सरकारी कामात अडथळा आणला. 

श्रीरामपूर तालुक्‍यातील एकलहरे शिवारात पकडलेल्या 54 लाख रुपयांच्या गुटखाप्रकरणातील संशयित मुख्य आरोपींना पोलिस निरीक्षक श्रीहरी बहिरट हे पाठीशी घालत असल्याचा आरोप करणारी तक्रार मकासरे यांनी नाशिक परिक्षेत्राचे विशेष पोलिस महानिरीक्षक डॉ. प्रताप दिघावकर यांची भेट घेऊन केली होती. त्यानंतर डॉ. दिघावकर यांनी श्रीरामपूरच्या अपर पोलिस अधीक्षक डॉ. दीपाली काळे यांना चौकशीचा आदेश दिला. 

दरम्यान, बहुचर्चित गुटखा प्रकरणाचा बहिरट यांच्याकडील तपास काढून घेण्यात आला. विशेष म्हणजे, श्रीरामपूरचे पोलिस अधीक्षक राहुल मदने यांना डावलून हा तपास शिर्डीच्या पोलिस उपअधीक्षकांकडे सोपविण्यात आला. त्यानंतर दुसऱ्याच दिवशी मदने यांच्याच अधिपत्याखालील राहुरी पोलिस ठाण्यात मकासरे यांच्याविरुद्ध दाखल झालेल्या या गुन्ह्याची पोलिस वर्तुळात राज्यभर चर्चा सुरू आहे. 

पोलिस कॉन्स्टेबल संदीप कानडे यांनी आणलेल्या समन्सवर कोणताही वाद न करता, सही करून दिली. त्यानंतर त्याच दिवशी सायंकाळी माझ्याविरुद्ध कानडे यांच्या फिर्यादीनुसार, कोणतीही शहानिशा न करता राहुरी पोलिस ठाण्यात सरकारी कामात अडथळा आणल्याचा गुन्हा दाखल झाल्याचे समजले. पोलिस निरीक्षक बहिरट यांच्याविरुद्ध तक्रार केल्याने माझे मानसिक खच्चीकरण करण्यासाठी हा खोटा गुन्हा दाखल केला आहे. 
- डॉ. विजय मकासरे, सामाजिक कार्यकर्ते, वळण 

संपादन - अशोक निंबाळकर