धुमधडक्यात लग्न केले नाही म्हणून मुलीने जीवनच संपवले

पारनेर ः सध्या कोरोनाने वधूपित्याने कंबरडे मोडले आहे. सर्वच व्यवहार ठप्प झाल्याने पहिल्यांदा त्याला जगण्याची  लढाई लढावी लागते. मात्र, उपवर मुलींची लग्न लावून देणे हेही कर्तव्य असल्याची त्याची गोची झाली आहे. मात्र प्रशासानाने कमी लोकांमध्ये कोणताही गाजावाजा न करता लग्न लावण्यास परवानगी दिली आहे. खर्च करण्याची ऐपत असणारेही अल्प खर्चात लग्न लावून देत आहेत. कोरोनामुळे लग्नसमारंभातील बडेजाव टाळला जात आहे. त्यातून दोन्ही पक्षाकडील लोकांचे लाखो रूपयांची बचत होते आहे. पारनेर तालुक्यात मात्र वेगळंच घडलं.

वाजत-गाजत, मोठ्या धुमधडाक्‍यात लग्न करून देण्यास आईने नकार दिल्याच्या रागातून पळशी येथील मुलीने घराजवळील झाडाला गळफास घेऊन काल (बुधवारी) आत्महत्या केली. ऋतुजा माधव काळे असे मृत मुलीचे नाव आहे.

हेही वाचा - तेरा वर्षांच्या मुलीची नऊ वर्षांच्या भावासमोर आत्महत्या 

अधिक माहिती अशी : पळशी येथील ऋतुजा हिचे नुकतेच लग्न जमले होते. मात्र, हे लग्न मोठ्या धुमधडाक्‍यात, वाजत-गाजत करावे, अशी ऋतुजाची इच्छा होती. ही इच्छा तिने आईजवळ व्यक्तही केली. मात्र, त्यास आईने नकार दिला. त्यातून माय-लेकीमध्ये किरकोळ वाद झाला. या वादातून संतापलेल्या ऋतुजा हिने बुधवारी (ता. 27) दुपारी साडेबाराच्या सुमारास राहत्या घराजवळील झाडाला गळफास घेऊन आत्महत्या केली.

टाकळी ढोकेश्वर येथील प्राथमिक आरोग्य केंद्रात तिच्या मृतदेहाची उत्तरीय तपासणी करण्यात आली. नंतर तिचा मृतदेह नातेवाइकांच्या ताब्यात देण्यात आला. या बाबत नातेवाइकांनी आमची काहीच तक्रार नसल्याचे पोलिसांना सांगितले. पारनेर पोलिस ठाण्यात अकस्मात मृत्यूची नोंद करण्यात आली आहे.