शासकीय कर्मचाऱ्यांचे निवृत्तीवय वाढवा

अकोला ः साथीच्या रोगाचा सामना करण्यासाठी राज्य सरकारला हवी असलेली ‘गंगाजळी’ उभारण्यासाठी शासकीय कर्मचाऱ्यांचे निवृत्तीचे वय दोन वर्षांनी वाढवण्याचा सल्ला विदर्भ वैधानिक विकास मंडळाचे माजी तज्ज्ञ सदस्य प्रा. डॉ. संजय खडक्कार यांनी राज्य सरकारला दिला आहे. Increase the retirement age of government employees

डॉ. खडक्कार यांनी मुख्यमंत्र्यांना लिहिलेल्या पत्रात म्हटले आहे की, कोरोनामुळे राज्याच्या अर्थव्यवस्थेवर विपरीत परिणाम होणे स्वाभाविक असल्याचे म्हटले आहे. राज्याची महसुली तूट ही नऊ हजार ५११ कोटी रुपये, तर वित्तीय तूट ५४ हजार ६१८ कोटी होण्याची शक्यता आहे. २०२०-२१ दरम्यान महाराष्ट्रचे दरडोई उत्पन्न पण कमी होण्याची शक्यता आहे. कोविडमुळे राज्यातील आरोग्य सेवांवर मोठा ताण पडत आहे. या परिस्थितीवर मात करण्यासाठी महाराष्ट्र सरकारने चालू अर्थसंकल्पात १२ हजार ५०० कोटी रुपयांचे पॅकेज जाहीर केले. आणखी खर्च वाढणार आहे.

अशी परिस्थिती असताना राज्य सरकारचे कर्मचारी सेवानिवृत्त होत आहेत. निवृत्तीच्या वेळी शासनाला मोठी रक्कम शासकीय कर्मचाऱ्यांना अदा करावी लागते. सध्याची राज्याची आर्थिक परिस्थिती बघता व आरोग्य सेवेसाठी प्राधान्य द्यावे लागत असल्याने, राज्य सरकारने आपल्या कर्मचाऱ्यांच्या सेवानिवृत्तीचे वय दोन वर्षे वाढवावे. त्यामुळे किमान दोन वर्षांसाठी राज्य तिजोरीवरील ओझे कमी होईल आणि राज्य सरकारला अर्थव्यवस्था सुधारण्यासाठी व आरोग्य सेवा सुधारणांसाठी मोठा निधी उपलब्ध होईल, असे डॉ. खडक्कार यांनी मुख्यमंत्र्यांना पाठविलेल्या पत्रात नमूद केले आहे.

संपादन - विवेक मेतकर