आखाडा बाळापूर : बाळापूर तालुका निर्मितीची मागणी अनेक वर्षांपासून प्रलंबित आहे. त्यावर तोडगा निघत नसल्याने पुन्हा हा प्रश्न पटलावर आला आहे. बाळापूर तालुका कृती समितीचे पदाधिकारी, सर्व पक्षीय नेते, व्यापाऱ्यांतर्फे बैठकींद्वारे मोहीम सुरू झाली असून लवकर मुंबई येथे घंटानाद आंदोलन करण्यात येणार आहे.

आखाडा बाळापूर तालुका निर्मितीचा प्रश्न तीन दशकांपासून प्रलंबित आहे. तत्कालीन मुख्यमंत्री, (cm)उपमुख्यमंत्र्यांसह मान्यवरांनी तालुका निर्मितीसाठी केवळ आश्वासनांची खैरात केली आहे. परंतु दखल घेतलेली नाही. विधानसभेच्या गत निवडणुकीमध्ये शिवसेना प्रमुख तथा विद्यमान मुख्यमंत्री उद्धव ठाकरे(UddhavThakre)यांनी परिसरात झालेल्या सभेत ''सत्ता माझ्या हाती द्या, मी बाळापूर तालुका करून दाखवतो’ असे आश्वासन दिले होते. त्यानंतर कोरोनाची (corona)लाट आल्याने हा प्रश्नही मागे पडला. या प्रश्नी तालुका कृती समितीच्या वतीने नुकत्याच काही बैठकी झाल्या.

परिसरातील सर्वपक्षीय नेते, व्यापारी, ग्रामपंचायतींचे पदाधिकारी, पत्रकार आदींनी उपस्थिती दर्शवून तालुका निर्मितीसाठी पाठिंबा जाहीर केला आहे.

.. तर ग्रामस्थांची होईल सोय

कळमनुरी तालुक्यातील वडगाव, रेडगाव ते कळमनुरी अंतर पन्नास किलोमीटरपेक्षा अधिक आहे. त्या परिसरातील ग्रामस्थांना कळमनुरी येथे कामासाठी यायचे म्हटले तर दिवस जातो. बाळापूर तालुका झाल्यास अंतर कमी होईल. वेळ व पैशांची बचत होईल, परिसरातील ग्रामस्थांची कामेही मार्गी लागतील, असा सूर बैठकांमधून व्यक्त झाला. तालुका निर्मितीच्या मागणीसाठी २६ जानेवारीला मुंबई येथील आझाद मैदानावर घंटानाद आंदोलन करण्यात येणार असल्याचेही यावेळी जाहीर करण्यात आले आहे.