नवी दिल्ली : ‘‘गेल्या काही महिन्यांमधील महाराष्ट्रातील राजकीय परिस्थिती बदलल्याने येत्या लोकसभा निवडणुकीनंतर काँग्रेस पक्ष हा राज्यातील सर्वात मोठा पक्ष म्हणून समोर येईल,’’ असा दावा काँग्रेसचे प्रवक्ते अतुल लोंढे यांनी दिल्लीत केला.

राज्यात काँग्रेसचा एकच खासदार निवडून आलेला असताना या दाव्यामागे असलेल्या कारणांची माहिती देताना ते म्हणाले, ‘‘गेल्या लोकसभा निवडणुकीत काँग्रेसचा एकच खासदार निवडून आला होता. यानंतर झालेल्या विधानसभा निवडणुकीत काँग्रेसचे २० आमदारही निवडून येणार नाही, असे दावे भाजपकडून केले जात होते.

परंतु विधानसभेत काँग्रेसचे ४४ आमदार निवडून आले. महाविकास आघाडीतील तिसऱ्या क्रमांकाचा पक्ष आता पहिल्या क्रमांकाचा पक्ष झाला आहे. गेल्या काही महिन्यांमध्ये झालेल्या राजकीय घडामोडीमुळे महाराष्ट्रातील जनता या सर्व घडामोडी अगदी निरखून पाहत आहे.

जातीयवादी भाजपशी लढणारा पक्ष म्हणून काँग्रेसची प्रतिमा तयार झाली आहे. गेल्या काही महिन्यांमध्ये झालेल्या पोटनिवडणुकांमध्येही पक्षाची स्थिती सुधारलेली दिसून येत आहे. यामुळे आता सात महिन्यांनंतर होणाऱ्या लोकसभा निवडणुकीत निश्चितपणे काँग्रेस पक्ष हा सर्वात मोठा पक्ष म्हणून समोर आलेला दिसणार आहे.’’

तीन इंजिनची दुरुस्ती आवश्यक

महाराष्ट्रात तीन इंजिनच्या सरकारने महाराष्ट्राची पुरती वाट लावल्याचा आरोप करून लोंढे म्हणाले, की केवळ दिल्लीत येऊन मुजरा करणे या पलिकडे या नेत्यांना काहीही काम राहिलेले नाही.

महाराष्ट्रात अतिवृष्टीमुळे नुकसान झालेले असताना केंद्र सरकारची एक दमडीसुद्धा महाराष्ट्राला मिळालेली नाही. शेतकरी हवालदिल झाला आहे व तीन इंजिनचे नेते पालकमंत्रिपदासाठी झगडत आहेत. यामुळे जनतेचा पूर्ण विश्वास गमावलेले व बेकायदेशीर सरकार सध्या महाराष्ट्रात असल्याचे अतुल लोंढे यांनी सांगितले.

काँग्रेस पक्षाची शिवसेना व राष्ट्रवादी काँग्रेससोबत आघाडी मजबूत आहे. या आघाडीच्या जागावाटपानुसार ज्या जागा काँग्रेसला मिळतील, त्या सर्व जागांवर विजय मिळविण्यासाठी कार्यकर्ते कामाला लागले आहेत.

- अतुल लोंढे, प्रवक्ते, काँग्रेस