22432

शास्त्रीय संगीत परीक्षेत
योगिता रायकरचे यश
सकाळ वृत्तसेवा
कुडाळ, ता. ३१ः मुंबई येथे झालेल्या हिंदुस्थानी शास्त्रीय संगीतात योगिता रायकर ‘युवा सुर सुरताज’ची मानकरी ठरली. डीएमएफ अर्थात देडिया म्युझिक फाउंडेशन या संस्थेने देशातील तरुण वर्गातील हिंदुस्थानी शास्त्रीय संगीतात नैपुण्यवान व प्रतिष्ठित प्रतिमेचा शोध घेण्यासाठी राष्ट्रीय पातळीवर दोन गटामध्ये प्रत्येकी तीन फेऱ्यांत स्पर्धा आयोजित केली.
प्राथमिक फेरी देशभरातून व्हिडीओ मागवून परीक्षणाद्वारे निवड चाचणी घेण्यात झाली. या स्पर्धेत वेगवेगळ्या राज्यांतील स्पर्धकांनी सहभाग घेतला. द्वितीय फेरी लाईव्ह ऑनलाईन पद्धतीने घेण्यात आली. त्यात दहा स्पर्धकांमधून पाच जणांची अंतिम फेरीसाठी निवड करण्यात आली. वरळी मुंबई येथे नेहरू सेंटर ऑडिटोरियममध्ये परीक्षक पंडित संजीव अभ्यंकर, विदुशी कौशिकी चक्रवर्ती व राहुल देशपांडे या दिग्गज गायकांच्या मार्गदर्शनखाली अंतिम फेरी घेण्यात आली.
योगिता रायकर हिच्या संगीतातील शास्त्रीय बार‌काव्यांवरील प्रभुत्वाने परीक्षकांवर एक वेगळीच छाप पडली. तिच्या सादरीकरणामध्ये हिंदुस्थानी शास्त्रीय संगीताचे चैतन्य व समृद्धता दिसून आली. त्यातूनच तिला या स्पर्धेमध्ये २३-३० वयोगटातून प्रथम क्रमांकासह ''युवा सुर सुरताज'' हा बहुमान मिळाला. तिला दीड लाख रुपये देऊन सन्मानित करण्यात आले.