आली दिवाळी------लोगो

तरुणाईचा ऑनलाईन खरेदीकडे कल

स्थानिक व्यापाऱ्यांमध्ये निरुत्साह ; दिवाळीवर महागाईचे सावट
सकाळ वृत्तसेवा
रत्नागिरी, ता. ३१ : दिवाळी सणावर महागाईमुळे मंदीचे सावट असल्याने सध्या खरेदीवर मर्यादा आलेल्या आहेत. त्यामध्ये ऑनलाईन खरेदीकडील तरुणाचा वाढता कल ही स्थानिक व्यापाऱ्यांपुढील मोठी समस्या बनलेली आहे. त्याचा फटका स्थानिक बाजारपेठेवर बसत असून सणासुदीच्या काळात अपेक्षित प्रतिसाद मिळत नसल्यामुळे व्यापाऱ्यांमध्ये निरुत्साह आहे.
उत्साहाच्या वातावरणात दिवाळी सण साजरा केला जातो. रोषणाई, आकर्षक कंदील, पणत्या, दिवे, फटाक्यांची आतषबाजी यासह खमंग फराळाने दिवाळाचा आनंद द्विगुणित होतो. गेली तीन ते चार दिवस खरेदीसाठी लगबग सुरू आहे. छोटे कंपनी शाळाना सुट्टी लागली की किल्ले बनविण्याच्या नादामध्ये व्यस्त असतात. परंतु महागाई आणि ऑनलाईन खरेदीमुळे या उत्साहवर विरजण पडले आहे. मंदीमुळे बाजारपेठ थंडावली असून दिवाळीत उलाढाल कमी झाली आहे. महागाईमुळे नागरिक त्रस्त आणि हैराण झालेले आहेत. जीवनावश्यक वस्तू घेण्यासाठी पुरेसे पैसे नसल्यामुळे फटाके खरेदीसाठी येणारे ग्राहक अगदीच कमी आहेत. मोठ-मोठी खरेदीची दुकाने आणि मार्ट झाल्यामुळे स्थानिक व्यापारी हवालदील झालेले आहेत. सणासुदीच्या दिवसात तरी बाजारपेठ उचल घेईल अशी अपेक्षा होती. परंतु तसा उत्साह ग्राहकांमध्ये दिसत नाही. त्यात तरूणाईचा तर ऑनलाईन खरेदीचे जास्त कल आहे. घरबसल्याने हवे ती वस्तू ऑनलाईन मागविता येते. त्यात बाजारपेठेपेक्षा कमी किंमत असल्याने त्याकडे जास्त कल आहे. या सर्वांचा स्थानिक बाजारपेठेवर मोठा परिणाम झाला आहे.
------
चौकट
फटाके विक्री घटली
ऱत्नागिरीतील फटाके विक्रेत्यांनी सांगितले की, दिवाळीत फटाक्यांना पुरेशी मागणी नाही. दरही दहा ते पंधरा टक्क्यांनी वाढलेले आहेत. त्यामुळे पूर्वीसारखी विक्री होईल असे वाटत नाही. कपडे खरेदी, सोने, वाहने खरेदीसाठीदेखील गर्दी दिसून येत नाही. महागाईमुळे फटाके विक्री घटली आहे. मंदी ओळखून यंदा ७५ टक्केच फटाके विक्रीस आणले आहेत.