२२५०३

कुडाळात पोलिसांकडून
रेल्वे प्रवाशांची तपासणी
सकाळ वृत्तसेवा
कुडाळ, ता. ३१ ः विधानसभा निवडणुकीच्या अनुषंगाने आचारसंहिता लागू करण्यात आली आहे. ही निवडणूक निर्भय, शांततेत पार पडावी, यासाठी रेल्वेतून होणारी अवैध दारू, शस्त्र, रोख रक्कम, अमली पदार्थ व इतर वाहतुकीवर कारवाई होणे आवश्यक आहे. त्यासाठी कुडाळ पोलिस प्रशासनाकडून कुडाळ रेल्वेस्थानकात येणाऱ्या गाड्यांची तपासणी करण्यात आली. यामध्ये मुंबईकडे जाणाऱ्या आणि मुंबईहून येणाऱ्या रेल्वे गाड्यांमधील प्रवाशांच्या सामानाची तपासणी करण्यात आली. पोलिस अधीक्षक सौरभकुमार अग्रवाल यांच्या आदेशानुसार आणि कुडाळ पोलिस निरीक्षक राजेंद्र मगदूम यांच्या मार्गदर्शनाखाली ही मोहीम राबविण्यात येत आहे. या मोहिमेत कुडाळ पोलिस निरीक्षक राजेंद्र मगदूम, सहायक पोलिस निरीक्षक शेखर लव्हे, पोलिस देवानंद माने, महिला हेडकॉन्‍स्टेबल एल. एल. जाधव, स्वप्नील चव्हाण, हेडकॉन्स्टेबल संजय कदम, हेडकॉन्स्टेबल हरेश पाटील, आवरी अप्पान आणि टीमने सहभाग घेतला.