आखातातील चिपळूणवासीय दाखल होणार

जाकीर शेकासन ः महायुतीच्या सभांचे नियोजन

सकाळ वृत्तसेवा
संगमेश्वर, ता. ३१ ः विधानसभा निवडणुकीचा प्रचार जसजसा पुढे जात आहे, तसतसा कार्यकर्त्यांमधील उत्साह वाढत आहे. चिपळूण-संगमेश्वर विधानसभा मतदारसंघातील महायुतीचे उमेदवार आमदार शेखर निकम यांच्या प्रचारासाठी दुबई आणि सौदी अरेबिया आदी आखाती देशातून पन्नासहुन अधिक कार्यकर्ते येत्या आठवड्यात दाखल होणार आहेत. तसेच काहींनी व्हिसा रद्द करून परदेशात जाण्याचा कार्यक्रम पुढे ढकलला आहे, असे राष्ट्रवादी काँग्रेस (अजित पवार गट) अल्पसंख्यांक सेलचे रत्नागिरी जिल्हाध्यक्ष जाकीर शेकासन यांनी सांगितले.
पत्रकारांना माहिती देताना शेकासन म्हणाले, चिपळूण आणि संगमेश्वर तालुक्यातील मुस्लिम समाजाकडून महायुतीच्या प्रचाराचे नियोजन करण्यात आलेले आहे. आमदार शेखर निकम यांनी मागील पाच वर्षात चांगला संपर्क ठेवलेला आहे. त्यामुळे मोहल्ल्यांमध्ये बैठकांचा धडाका सुरु आहे. चिपळूण तालुका अध्यक्ष समीर काझी, संगमेश्वर तालुका अध्यक्ष मुराद आंबेडकर यांच्या नेतृत्वाखाली ही मोहीम सुरु आहे.
निकम यांच्यासाठी दुबई, सौदी अरेबिया, कुवेत, कतार या आखाती देशात नोकरीनिमित्त राहिलेले चिपळूण-संगमेश्वर मतदारसंघातील अनेकजण लवकरच दाखल होणार आहेत. कार्यकर्त्यांनी आपला व्हिसा रद्द करून नोकरीला जाण्याचे पुढे ढकलले आहे.