22532

कणकवलीतील नरकासूर स्पर्धेत हळवल संघ प्रथम
लांजेवाडी कलमठ द्वितीय तर कणकवली संघाला तृतीय क्रमांक
कणकवली, ता. ३१ : शहरातील कांबळे गल्‍ली हनुमान मंदिर येथे झालेल्‍या नरकासूर स्पर्धेत श्री देव रवळनाथ मित्र मंडळ हळवल संघाने प्रथम क्रमांक पटकावला. संकल्प मित्र मंडळ लांजेवाडी कलमठ संघाला द्वितीय क्रमांक आणि स्वयंभू मित्र मंडळ कणकवली यांना तृतीय क्रमांक देण्यात आला. वैभव मालंडकर मित्र मंडळाने ही स्पर्धा आयोजित केली होती.
या स्पर्धेचा प्रारंभ कांबळेगल्‍ली हनुमान मंदिर येथे सामाजिक कार्यकर्ते वैभव मालंडकर, विवेकानंद पाटकर यांच्या हस्ते श्रीफळ वाढवून करण्यात झाला. कणकवली शहर आणि लगतच्या गावातील मंडळांच्या नरकासूर प्रतिमा या स्पर्धेत सहभागी झाल्‍या होत्या. दहा ते पंधरा फुट उंचीपर्यंतच्या या नरकासूर प्रतिमा पाहण्यासाठी प्रेक्षकांनी मोठी गर्दी केली होती. या स्पर्धेचे परीक्षण संतोष सुतार, गणपत मालंडकर, शशांक बोर्डवेकर, निनाद दीपनाईक यांनी केले. सूत्रसंचालन बाळू वालावलकर यांनी केले.