कुवेला एक न्याय, कोत्रेवाडीला मात्र दुसरा
डम्पिंग हटाव हा अस्तित्वाचा लढा; राजकीय हेतू नाही
सकाळ वृत्तसेवा
लांजा, ता. १९ : कुवे येथे टाकलेल्या कचऱ्यामुळे तेथील नागरिकांना त्रास होतो म्हणून लांजा नगरपंचायत प्रशासन त्याची तत्काळ दखल घेऊन कार्यवाही करण्याचे पत्र देते; मात्र कोत्रेवाडी येथे वाडीवस्तीलगत नियोजित डम्पिंग ग्राउंड प्रकल्प राबवला जात असताना आणि लोकांचा त्याला सातत्याने विरोध असताना नगरपंचायत जाणीवपूर्वक दुर्लक्ष करते. आंदोलने, उपोषण करूनही प्रशासन समोर येत नाही. यामागे नेमके काय दडले आहे? असा सवालदेखील कोत्रेवाडी नागरिकांनी उपस्थित केला आहे.
डम्पिंग हटाव हा आमच्या अस्तित्वाचा लढा आहे. त्यात कोणताही राजकीय हेतू नसून, आमच्या न्यायहक्कांसाठी तो आम्ही पुकारलेला आहे. जोपर्यंत डम्पिंग ग्राउंड रद्द होत नाही, तोपर्यंत आमचा लढा हा असाच कायम चालू राहील. कोणी कितीही आमिषे दाखवली तरी आम्ही आमच्या निश्चयापासून ढळणार नाही, अशी रोखठोक भूमिका कोत्रेवाडी येथील नागरिकांनी घेतली आहे. लांजा नगरपंचायत प्रशासन नागरिकांच्या संयमाचा बांध फुटण्याची वाट पाहात आहे का? असा सवाल करतानाच यातूनच भविष्यात काही प्रकार घडला तर त्याची सर्वस्वी जबाबदारी ही लांजा नगरपंचायत प्रशासनावर राहील, असा इशारादेखील कोत्रेवाडी नागरिकांच्यावतीने देण्यात आला आहे.

डम्पिंग ग्राउंडचे स्थलांतर किंवा रद्द करा
८ जुलैला नागरिकांनी छेडलेल्या लाक्षणिक उपोषणाला उत्तर देण्यासाठी नगरपंचायतीचा एकही सक्षम अधिकारी त्या ठिकाणी येऊ शकला नाही. त्यामुळे लोकांच्या प्रश्नाचे उत्तर प्रशासनाकडे नाही का? असा सवालदेखील नागरिकांनी उपस्थित केला आहे. कोत्रेवाडी नागरिकांनी पुकारलेल्या आंदोलन, उपोषणाला जर सामोरे जाता येत नसेल, त्यांच्या प्रश्नांना उत्तरे देता येत नसतील, तर नगरपंचायत प्रशासनाच्या संबंधित सक्षम अधिकाऱ्यांनी एकतर हा डम्पिंग ग्राउंड प्रकल्प स्थलांतरित किंवा रद्द करत असल्याचे लेखी पत्र आम्हाला द्यावे, अशी मागणीदेखील कोत्रेवाडी नागरिकांच्यावतीने करण्यात आली आहे.
---
लढा राजकीय हेतूने नाही
कोत्रेवाडी नागरिकांच्यावतीने गेल्या चार वर्षांपासून डम्पिंग ग्राउंडविरोधात पुकारण्यात आलेला हा लढा कोणत्याही राजकीय हेतूने सुरू केलेला नसून, आंदोलनात कोणतीही बाहेरील व्यक्तीदेखील सहभागी झालेली नाही. यापूर्वी केलेल्या उपोषण, आंदोलनाला लांजा तालुका भाजप, काँग्रेस या पक्षांनीदेखील पाठिंबा दिला होता, तर ८ जुलै रोजी छेडलेल्या लाक्षणिक उपोषणाला शिवसेना ठाकरे पक्षानेदेखील पाठिंबा दिला होता.
---