78751

बाल वैज्ञानिकांच्या सृजनशीलतेचे कौतुक

‘रोबोटिक्स प्रदर्शनी’; शिडवणे शाळा क्र. १ तंत्रस्नेही

सकाळ वृत्तसेवा
तळेरे, ता. २० : जिल्हा परिषद पूर्व प्राथमिक शाळा शिडवणे क्र. १ शाळेत आयोजित ‘रोबोटिक्स प्रदर्शनी’ने विद्यार्थ्यांमधील वैज्ञानिक कुतूहल आणि तंत्रज्ञान कौशल्याला नवा आयाम दिला. यानिमित्ताने विद्यार्थ्यांमधील विज्ञानविषयक कुतूहल जागृत झाल्याचे गौरवोद्‌गार उपस्थित मान्यवरांनी काढले.
या प्रदर्शनीला माजी वित्त आणि बांधकाम सभापती रवींद्र जठार, शिडवणे सरपंच रवींद्र शेट्ये, कणकवली गटशिक्षणाधिकारी किशोर गवस, केंद्रप्रमुख सद्‌गुरू कुबल, शाळा व्यवस्थापन समिती सदस्य, पालक वर्ग, शिक्षक वर्ग आणि विद्यार्थी वृंदांची उपस्थिती होती.
‘रोबोटिक्स’ तंत्रस्नेही शिक्षक दीपक काळेल यांच्या मार्गदर्शनाखाली विद्यार्थ्यांनी विविध आकर्षक रोबोटिक मॉडेल्स तयार केली. या मॉडेल्सचे प्रत्यक्ष सादरीकरण विद्यार्थ्यांनी केले. विद्यार्थ्यांच्या उत्कृष्ट सादरीकरणाने सर्वांची मने जिंकली. रिमोटच्या सहाय्याने चालणाऱ्या गाडीचे प्रात्यक्षिक लक्षवेधी ठरले. विद्यार्थी आरव गुंडये याने मोबाईलवर कोडिंग करून त्यावर आधारित रिमोटने गाडी चालवून दाखविण्यासाठी केलेल्या कोडिंगचे उपस्थितांनी कौतुक केले.
जिल्हा परिषद सिंधुदुर्गने काही मोठ्या शाळांमधील शिक्षकांना रोबोटिक तंत्रज्ञानासाठी प्रशिक्षित केले असून, त्याचा सकारात्मक परिणाम शिडवणे क्र. १ शाळेत दिसून आला. या प्रदर्शनीमुळे विद्यार्थ्यांना तंत्रज्ञानाचे व्यावहारिक ज्ञान मिळाले आणि त्यांना भविष्यातील आव्हानांसाठी तयार होण्याची प्रेरणा मिळाली. दीपक काळेल आणि अन्य शिक्षकांनी विद्यार्थ्यांमध्ये तंत्रज्ञानाची आवड निर्माण केल्याबद्दल त्यांची प्रशंसा केली. या यशस्वी प्रदर्शनीच्या माध्यमातून शिडवणे क्र. १ शाळेने शैक्षणिक आणि तंत्रज्ञान क्षेत्रात एक महत्त्वाचे पाऊल टाकले आहे.