चिकन, मासे, मटण खरेदीस
देवगडमध्ये खवय्यांची गर्दी

श्रावणाची चाहूल; वर्षापर्यटनही बहरले

सकाळ वृत्तसेवा
देवगड, ता. २० ः श्रावण महिना जवळ आल्याने चिकन, मासे, मटण खरेदीसाठी खवय्यांची आज सकाळपासूनच विक्रेत्यांकडे गर्दी झाली होती. चिकन खरेदी करण्यासाठी सकाळपासूनच रांग लागली होती. मटण आणि मासे खरेदीसाठीही अनेकांनी सकाळपासूनच बाजाराकडे धाव घेतली होती. माशांचे दरही आज चांगलेच वधारल्याचे चित्र होते.
शुक्रवारपासून (ता.२५) श्रावण महिन्याला प्रारंभ होणार आहे. तत्पूर्वी गुरुवार असल्याने त्यादिवशी अनेकजण मांसाहार करीत नाहीत. त्यामुळे आजचा आणि बुधवारचा असे दोनच दिवस श्रावण महिना पाळणाऱ्यांसाठी मांसाहार खाण्यासाठी शिल्लक राहिले. त्यामुळे आजच्या दिवशी बाजारात सकाळपासूनच खरेदीसाठी गर्दी झाली होती. मासळी, चिकन, मटण बाजार बहरला होता. पसंतीनुसार नागरिक खरेदी करीत होते. जामसंडे परिसरात चिकन विक्रेत्यांकडे सकाळी ७ वाजल्यापासूनच खवय्ये खरेदीसाठी येताना दिसत होते. मासळी खरेदीसाठीही गर्दी होती. आषाढातील आजचा अखेरचा रविवार असल्याने मांसाहार करणाऱ्यांची चांगलीच धांदल दिसत होती. काहींनी वर्षापर्यटनाचे बेतही आखल्याचे चित्र होते. गेल्या दोन दिवसांपासून तालुक्यात पावसाच्या सरी कोसळत असल्याने नैसर्गिक धबधबे चांगलेच प्रवाहित झाले आहेत. त्यामुळे तरुणाई सध्या पावसाळी पर्यटनामध्ये दंग आहे. दरम्यान, बुधवारी (ता.२३) श्रावणापूर्वीचा दिवस असल्याने त्या दिवशीही मांसाहाराची मोठी उलाढाल होईल, असे दिसते.