पक्षकार्यासाठी पुन्हा सक्रिय
व्हा ः पालकमंत्री राणे

एकनाथ नाडकर्णी यांना आवाहन

सकाळ वृत्तसेवा
दोडामार्ग, ता. २० : भाजपचे तत्कालीन जिल्हा चिटणीस एकनाथ नाडकर्णी यांचे पक्षातून करण्यात आलेले निलंबन अलीकडेच जिल्हाध्यक्ष प्रभाकर सावंत यांनी रद्द केले. त्यानंतर आज नाडकर्णी यांनी दोडामार्ग येथील पदाधिकारी व कार्यकर्त्यांसह पालकमंत्री नीतेश राणे यांची कणकवली येथील ‘ओम गणेश’ निवासस्थानी भेट घेत चर्चा केली. यावेळी पालकमंत्री राणे यांनी नाडकर्णी यांना शुभेच्छा देत ‘पक्षकार्यासाठी पुन्हा सक्रिय व्हा,’ असे आवाहन केले.
गतवर्षी २०२४ च्या विधानसभा निवडणुकीत पक्षशिस्त भंगाचा ठपका ठेवत नाडकर्णी यांचे भाजपमधून निलंबन करण्यात आले होते. त्यानंतर अलीकडेच नाडकर्णी यांनी पक्षाकडे निलंबन रद्द करण्याची विनंती केली होती. भाजपचे जिल्हाध्यक्ष सावंत यांनी त्यांचे निलंबन रद्द केले होते. नाडकर्णी हे पक्षातील एक ज्येष्ठ पदाधिकारी असून, त्यांनी यापूर्वी पक्षासाठी दिलेले योगदान विचारात घेऊन हे निलंबन रद्द करण्याचा निर्णय त्यांनी घेतला होता. पालकमंत्र्यांच्या या भेटीवेळी नाडकर्णी यांच्यासह दोडामार्ग भाजप तालुकाध्यक्ष दीपक गवस, माजी अध्यक्ष सुधीर दळवी, आंनद तळणकर, वैभव इनामदार, संजय सातार्डेकर, प्रकाश गवस, संजय विरनोडकर, कळणे सरपंच श्री. देसाई, तळकट सरपंच सुरेंद्र सावंत, तुकाराम बर्डे आदी कार्यकर्ते उपस्थित होते.