ज्ञानपरंपरेला सकारात्मक दिशा
डॉ. दिनकर मराठे ः ‘संस्कृत अध्ययन’ उंचीवर पोहोचेल
सकाळ वृत्तसेवा
रत्नागिरी, ता. १८ : महाराष्ट्राचे राज्यपाल आचार्य देवव्रत यांनी संस्कृतमध्ये घेतलेली पदाची शपथ घेतली तसेच पालकमंत्री उदय सामंत यांनी कविकुलगुरू कालिदास विश्वविद्यालयाकरिता एक एकर जमीन देण्याची घोषणा यामुळे रत्नागिरीत भारतीय ज्ञानपरंपरेला पोषक वातावरण तयार होत आहे. भारतरत्न डॉ. पां. वा. काणे संस्कृत अध्ययन उपकेंद्र यापुढेही अधिक चांगल्यारीतीने ज्ञानपरंपरा वाढवेल, असा विश्वास केंद्राचे संचालक डॉ. दिनकर मराठे यांनी व्यक्त केला.
डॉ. सामंत यांनी केलेल्या घोषणेमुळे निश्चितच त्यांच्या सहकार्याने हे उपकेंद्र मोठ्या उंचीवर पोहोचेल, असेही डॉ. मराठे म्हणाले. देवव्रत यांच्याकडे महाराष्ट्राच्या राज्यपाल पदाचा अतिरिक्त कारभार सोपवण्यात आला. त्यांनी मुंबईत राजभवनामध्ये शपथविधी सोहळ्यात संस्कृत भाषेतून शपथ घेतली, ही विशेष लक्षणीय बाब म्हणावी लागेल. या आधीही अनेकदा संविधानिक पदावर असणाऱ्या व्यक्तींनी पदाची शपथ संस्कृतमधून घेत संस्कृत भाषेचा यथार्थाने गौरव केला आहे. देवव्रत यांना अध्यापनाचा व प्रशासनाचा मोठा अनुभव आहे शिवाय ते संस्कृतचे अभ्यासक आहेत. त्यामुळे कालिदास विश्वविद्यालयाकडे ते अधिक सकारात्मकतेने पाहतील, असे डॉ. मराठे यांनी सांगितले.