जमीनविक्रीचे पैसे न मिळाल्याने
वृद्धाची गळफास घेऊन आत्महत्या
दोघा संशयितांना अटक ; हर्णैतील प्रकार
सकाळ वृत्तसेवा
दापोली, ता. १ ः तालुक्यातील हर्णै-राजवाडी येथे एका वृद्धाने गळफास घेऊन आत्महत्या केली. मृताचे नाव जयंत भागोजी दुबळे (वय ८०, रा. हर्णै राजवाडी) असे आहे. त्यांच्या जमिनीचा विक्रीचा व्यवहार झाला होता. या व्यवहारातील जमिनीच्या मोबदल्यातील ४० लाख रुपये त्यांना येणे बाकी होते. ते पैसे त्यांना न मिळाल्याने तसेच या पैशांच्या व्यवहारावरून वारंवार मानसिक छळ झाल्यामुळे त्यांनी आत्महत्या केल्याचे उघड झाले आहे.
या प्रकरणी दापोली पोलिस ठाण्यात गुन्हा दाखल करण्यात आला असून पुढील तपासासाठी दोन संशयितांना अटक करण्यात आल्याची माहिती दापोली पोलिस निरीक्षक महेश तोरस्कर यांनी दिली. याबाबत मृताचे नातू कौशिक संजय दुबळे (वय २५) यांनी फिर्याद दिली आहे. फिर्यादीने दिलेल्या तक्रारीनुसार, जयंत भागोजी दुबळे यांना संशयितांनी त्यांच्या जमिनीच्या मोबदल्यातील ४० लाख रुपये देणे टाळत असल्याप्रकरणी दापोली पोलिसांनी संदेश शंकर कदम (वय ४८, रा. जालगाव बर्वेआळी, मूळ रा. हर्णै राजवाडी) आणि अमोल भालचंद्र गुरव (वय ३९, रा. हर्णै मोठीगोबाव, दापोली) या दोघा संशयितांविरुद्ध गुन्हा दाखल करून त्यांना अटक करण्यात आली आहे. या गुन्ह्याचा पुढील तपास पोलिस निरीक्षक विवेक आहिरे व सहाय्यक पोलिस निरीक्षक पूजा हिरेमठ या करत आहेत.