rat11p10.jpg-
3706
राजापूर ः नदीपात्रातील पाणी कमी झाल्याने कोरडे पडत चाललेले नदीपात्र.
--------------
राजापुरात हजार बंधारे अडवणार पाणी
टंचाईकाळात उपयोग; प्रत्येक ग्रामपंचायतीला दहाचे उद्दिष्ट
सकाळ वृत्तसेवा
राजापूर, ता. १२ ः दरवर्षीच्या तुलनेमध्ये यावर्षी कमी पडलेला पाऊस आणि नोव्हेंबर महिन्यातच पाण्याअभावी नदीची कोरडी पडलेली पात्रं यामुळे तालुक्याला लवकरच तीव्र पाणीटंचाईला सामोरे जावे लागण्याची शक्यता आहे. या पार्श्‍वभूमीवर पंचायत समिती प्रशासनाने गटविकास अधिकारी तुकाराम जाधव यांच्या मार्गदर्शनाखाली आतापासूनच नियोजन सुरू आहे. प्रत्येक ग्रामपंचायतीमध्ये किमान दहा यानुसार तालुक्यामध्ये एक हजाराहून अधिक वनराई बंधारे बांधण्याचा निर्धार करण्यात आला आहे.
वनराई बंधारे बांधण्याच्या या अभियानामध्ये लोकप्रतिनिधींसह ग्रामपंचायत, ग्रामस्थ, विविध स्वयंसेवी संस्थांचे पदाधिकारी, प्रशासन आदी सहभागी होणार आहेत. एप्रिल-मे महिन्यातील संभाव्य पाणीटंचाईच्या पार्श्‍वभूमीवर निर्धारित करण्यात आलेले वनराई बंधारे बांधण्याचे उद्दिष्ट गाठल्यास पाणीटंचाईची झळ कमी प्रमाणात बसण्याची शक्यता आहे. त्यामुळे लोकसहभागातून गावोगावी बांधण्यात येणार्‍या बंधारे अभियानामध्ये सर्वांनी सहभागी व्हावे, असे आवाहन पंचायत समितीतर्फे करण्यात आले आहे.