लोटेतील सात कंपन्यांना
प्रदूषण मंडळाच्या नोटिसा
चिपळूण, ता. १२ ः थेट नाल्यामध्ये सांडपाणी सोडल्याच्या गंभीर तक्रारीनंतर महाराष्ट्र प्रदूषण नियंत्रण मंडळाने लोटे औद्योगिक वसाहतीमधील ७ कंपन्यांवर कारवाईचा बडगा उगारला आहे. प्रदुषणावरून संबंधित उद्योगांना नोटिसा बजावल्या आहेत. यामध्ये एका मोठ्या उद्योगाचा समावेश असून, त्यांच्यावर कायदेशीर कारवाईचा प्रस्तावही मंडळाच्या वरिष्ठ कार्यालयाकडे पाठवला आहे.
लोटे औद्योगिक वसाहतीतील काही कंपन्या प्रदुषणास कारणीभूत ठरत आहेत. कधी हवा तर कधी जलप्रदुषणामुळे येथील कंपन्याविरूद्ध वारंवार तक्रारी होत आहेत. त्याप्रमाणे प्रदूषण नियंत्रण मंडळ संबंधित कंपन्यांना कारणे दाखवा नोटीस वारंवार बजावत आले आहे; मात्र त्यानंतरही प्रदुषणाचा सिलसिला सुरूच आहे. काही दिवसांपूर्वी नाल्यांमध्ये रासायनिक सांडपाणी सोडल्याचे प्रकरण उघडकीस आले होते.
या पार्श्वभूमीवर प्रदूषण नियंत्रण मंडळाच्या अधिकाऱ्यांनी तपास करून संबंधित उद्योगांची चौकशी केली. त्यानंतर या उद्योगांना नोटिसा दिल्या आहेत. यामध्ये ए. बी. मौरी, ताज हेल्थकेअर लि. बी-२० व बी १४, सहस्र केमिकल्स, योजना इंडस्ट्रिज, पुष्कर केमिकल्स बी-९७ व भारत ऑरगॅनिक्स या कंपन्यांचा समावेश आहे. स्थानिक मच्छीमार व रहिवाशांनी प्रदुषणाचा प्रश्न कायमस्वरूपी सोडवण्यासाठी कठोर पावले उचलण्याची मागणी केली आहे.